_Pathian Nena Inzawm:_ _Lalpa Ṭawngṭaina_
By Rick Warren
— May 02, 2025
“Taksa pum khatah pêng hrang tam tak kan nei a, pêng zawng zawngin thawh hrang an nei ṭheuh; chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni.” [Rom 12:4-5]
Bible-a kohhran chanchin sawina langsar ber chu “Krista taksa” tih chu a ni a. Isua Krista chuan mihring taksa ang pua he khawvela a len laia a tih ang kha vawiin hian chhunzawm turin a duh che u. Leiah hian Krista taksa te chu kan ni a ni.
Bible chuan, “Taksa pum khatah pêng hrang tam tak kan nei a, pêng zawng zawngin thawh hrang an nei ṭheuh; chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni,” tiin a sawi [Rom 12:4-5]
Mi tinte chu Krista taksa – Krista taksaah chuan pawimawhna an nei vek a. A peng hrang hrang kan ni a, kan zavai hian a tifamkimtute kan ni.
Thil remkhawm [jigsaw puzzle] ang deuh a ni. Remkhawm infiamna [jigsaw puzzle] i rem lai chuan a kim lo a lo awm ṭhin a, eng ber nge i zawn ṭhin? A kim lo tak chu a ni ang.
Chu chu Krista taksa ang deuh chu a ni. Mi tinte chuan hlutna an nei vek a. “Kei chu Krista taksaah chuan ke tin tiat lek ka ni e” i ti mai thei. I ke tin i titla palh tawh em? I hria ang. Vawi khat chu lung kg 6 vel hi ka ke zungpui chungah ka titla palh a. Taksa peng zinga a te ber ni mahsela, a hnu thla ruk vel thleng chuan ka hre zui ta vang vang a ni.
Thil langsar tih leh ṭangkaina tih thu chu ngaihfin ngai suh ang che. Thil ṭhenkhat chu langsar tak ni mahse an ṭangkai em em lo thei. Ka hnar chu a langsar em em a. A invuah ve ngei mai a. A awm loh pawhin ka thi kher lo vang. Ka hnar tel lo pawh hian hlim takin ka la nung chhunzawm zel thei ang. A langsar hle a, mahse a tel lo pawhin a khawsak theih.
Mahse keimahah hian a tel lova khawsak theih miah loh thil a awm a, thin te, chuap te leh lungte chu an ni. An langsar miah lo, mahse ka nei lo a nih ngat chuan ka thi nghal ang – a chhan chu an tel lovin ka awm thei lo.
Krista taksa ho zingah chuan a langsar ber i ni lo mai thei, mahse i ṭangkai hle thung si ang. Krista taksa zingah chuan peng tam tak a awm a, mitinte chuan pawimawhna an nei vek. Hna thawh tur kan nei ṭheuh a ni!
Ngaihtuah zui atan
A langsar ber i ni lo chung pawhin engtiang takin nge Pathian chuan Krista taksaa a peng ṭangkai takah chuan a siam che?
Krista taksa aṭanga i kal hran lai boruak chu han ngaihtuah chhin teh. Chu chuan engtin nge i nun a nghawng?
Mi tu emaw Krista taksa zinga mi langsar si lo ṭangkai em em thung si mihring chu han ngaihtuah teh. Chutiang mi chu thlarauva thanglian turin engtin nge i fuih theih ang?
*Pathian chuan a chatuan chhungte zinga tel turin a duh che.*
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment