_Hmangaihna Thumal Ropui Pasarih_
- Rick Warren
- April 05, 2025
_"Sual ngaihdam a nih tawh chuan sual thawina hlan a ngai tawh lo."_ (Hebrai 10:18, NLT)
Thuthlung Hlui hunah chuan Pathian mite kha an sual thawi nan a man an pek a ṭul tih entir nan inthawina an hlan a ṭul ṭhin. Mahse Isua krawsa a thih hnuah erawh inthawina hlan a ngai tawh lo. I thil tih sual avanga thawina chu Isua kha a ni tawh.
Thil eng emaw i tih sual avangin i inthiam lo mai thei. Pathianin a ngaidam che tih i hria a, mahse Pathian ngaihdamna i la tem miah lo a, i sual te laka fihlim turin i la bei ṭalh ṭalh reng a ni. Biak ina inkhawm emaw, sawma pakhat pek emaw, mifel nih tumna emawin i sualna a la bo thei niin i ngai a ni mai thei.
Mahse ba rulh zawh tawh rulh tum ang mai i ni!
_"Sual ngaihdam a nih tawh chuan sual thawina hlan a ngai tawh lo."_ (Hebrai 10:18, NLT)
Isua inpekna kha a tawpkhawk a ni a. A famkim a, hun kal tawh, tun hun leh nakin hun atan a hlen chhuak vek a ni. Chu chu chanchin ṭha chu a ni! I sual tlan nan hei aia thil ropui tih i nei thei ngai lovang, a chhan chu Isuan a pek tlak tawh tlat avangin.
I tihsual man i pek nawn fo a ngai tawh lo.
Pitar pakhat chu insurance company hnenah va kalin, "Ka pasal hi kum nga kal taah khan a boral a, in hnenah life insurance a rawn dah ṭhin pawh ka rawn dah luh chhunzawm thei tawh lo a ni" tiin. Heti hian a thawktuten an lo hrilh a, "Ka pi, i dah luh a ngai tawh hleinem. Pek a ni tawh a, chuta ṭanga a hlawkna chu i tel tawh zawk dawn alawm. I pasal a thi tawh a, a thihna aṭanga a hlawkna chu i tel tawh zawk dawn a ni. Engmah i pek a ngai tawh lo ve" tiin.
Chutiang chiah chu Isuan i tana a tihsak che chu a ni.
Kraws lera a thih mek lai khan heti hian Isua kha a au chhuak a, "Tetelestai!" tiin, a awmzia chu, "A kin ta" tihna a ni. A man pek tlak vek a ni. Engmah pek i ngai tawh lo. A hlawkna i lo tel tawh mai dawn a ni.
I sual man zawng zawng, thilsual i tih tawh te leh i la tihtur zawng zawng Isuan krawsa a thihna hmangin a man a pe tlak vek a ni tih rinnaa i pawm khan ngaihdamna, chhandamna leh nun tam i ta a lo ni. Nghak suh. Vawiin hian a ngaihdamna chang rawh.
Ngaihtuah zui atan.
Eng thil pakhat nge Pathianin a ngaihdam theih ngai loh tur ni a i rin? Chu sual ngaihdam nan chuan Isua inpekna kha a tawk maiin i ring tawh em?
Isuan i sual a ngaidam a ni tih i rin rual khan ngaiawh leh tur leh siamṭha leh turin engnge i tih ngai ni a i rin?
Eng anga zingin nge i sual i puan ṭhin? Chu chuan sual vanga i inthiam lohna kha eng chenin nge a lak kian?
*Isuan a man a pe vek tawh.*
Bible chuan mitin hian Pathian tehna kan tlin zawh loh thu min hrilh. Mahse Pathianin a hmangaih tho che - suala tluin dik lohna nei mahla. Pathianin a hmangaih em che avangin a Fapa, Isua chu i sual laka tleng fai a Pathian chhungte zinga i tel theih nan a rawn tir a ni.
Pathian chhungte zinga tel tura i inpeih chuan heti hian ṭawngṭai rawh le:
"Lalpa, ka thih hunah ka chanchin i hmaah ka sawi dawn a ni tih ka hria a. Ka haider ṭhin che a ni tih ka puang e. I lakah thil sual tiin i remruat ang ni lovin ka duh danin ka nung a ni tih ka hria. Tun aṭang hian ka nun dan thlak ka duh. Sual lak ata i hnen lam rawn pan ka duh.
"Ka sual sual man ka tawrh loh nan ka sual zawng zawng ai thi tura Isua i rawn tirh a avangin ka lawm e. I ngaihdam ka phu lo tih ka inhria. I khawngaihna chauhin min chhandam thei tih ka hria.
"Isu, min hmangaih em avanga ka sual zawng zawng i phurh avangin ka lawm e. Vanram luttlakah min siam a, min chhandam turin ka ngen a che. Tuna ka nun tibuai mektu sualte leh chin ṭhan ṭha lote lak ata min chhandam turin ka ngen a che. Isu ka ring a che. Tunah hian ka pumin, chatuan atana min chhandam turin i thutiamah i ding nghet ang tih ka ring e. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment