Sunday, March 23, 2025

VAWIIN HIAN CHHANDAMNA KAWNGAH THUTLUKNA SIAM RAWH

_Hmangaihna Thumal Ropui Pasarih_

- Rick Warren 
- March 23, 2025
_""Tih tak meuhvin ka hrilh a che, vawiinah hian ka hnenah Paradis-ah i awm ve ang."_ (Luka 23:43)

Isua kianga an khenbeh ve misual pakhat zawk khan Isua hnenah amah hre reng tura a ngen khan Isuan heti hian a chhang a, _""Tih tak meuhvin ka hrilh a che, vawiinah hian ka hnenah Paradis-ah i awm ve ang"_ (Luka 23:43). He a chhanna hmang hian Isuan chhandamna nihphung kawng li a sawi a, chu chu nang pawhin ringin innghah nan i hmang thei ang.

*A hmasa berah chuan, chhandamna hi chawplehchilha thleng nghal a ni.* Isuan, "Vawiinah" a ti. I thih rual rual khan Pathian chênna hmunah emaw Pathian awm lohna hmunah emaw i kal nghal ang. Chutiang chiah chuan chhandamna pawh thil thleng nghal thei a ni. Isua hnenah chhandam tura i ngen rual chiah khan a lo thleng nghal a ni.

*A pahnihnaah chuan, chhandamna chu thil thleng ngei a ni.* Isuan, "Vawiin hian . . . i awm ve ang" a ti  "I awm ve mai thei," emaw "ka beisei e," emaw a ti lo. "Ka lo ngaihtuah phawt ange" pawh a ti hek lo. "I awm ang" a ti mai a ni. Krista i pawm rual chiah khan chhandamnaah i chiang nghal thei ang.

*A pathumnaah chuan, chhandamna chu inzawmna a ni.* Isuan, "Ka hnenah i awm ang" a ti. Chhandamna hi sakhuana a ni lo. Dan emaw inkaihhruaina emaw sakhaw serh leh sang emaw a ni lo. Inzawmna/Inlaichinna a ni. Chu inzawmna chu vanrama i luh huna inṭan tur chauh a ni lo. He leiah hian a inṭan a ni. Isuan i ṭhian ṭha ber nih a duh a; englai pawha biak che a duh a ni. Pathianin amah nena inzawm tura a siam che i ni!

*A palinaah chuan, chhandamna chuan hmun tak takah a hruai.* Isuan, "Vawiin hian ka hnenah Paradis-ah i awm ang" a ti. Vanram hi a awm tak tak a, chatuan atan a ni.

Isua kiangah misual pahnih khenbeh an ni ve a, a dinglam leh a veilamah. Isuan chhandamna turin duhthlanna a pe ve ve a, nang pawh chutiang ang duhthlanna chu a pe ve che. Amah hmangaih turin a tilui lo ang che. Amah ring turin emaw vanram pawm turin emaw a nawr lui dawn lo che. Duhthlanna chu i kutah a awm.

Misual pakhat zawk chuan Isua a hnawl a. Pakhat zawk chuan rinnain Isua lam a hawi. Nang pawh chutiang chiah chuan duhthlan theihna i nei.

Rom 10:13-ah chuan heti hian kan hmu, _"Tupawh Lalpa hming lam apiangte chu chhandamin an awm ang."_ Chhandamna chungchangah he thudik hi i ring em? Lalpa hming lam turin i inpeih em?

Bible chuan heti hian a ti, _"Ngai teh u, tun hi hun lawmawm chu a ni a, ngai teh u, tun hi chhandamna ni chu a ni"_ (2 Kor. 6:2). 

Vawiin hian i chatuan hmun tur thlang fel rawh. Isuan chhandamna min pek a tiam chu ring mai rawh.

Ngaihtuah zui atan.

I thih hunah chuan Pathian chénnaah emaw Pathian awm lohna hmunah emaw i kal ang. He thudik hian a fuih che nge a tihlauthawng che? Engtinnge hemi i dawnsawn dan hian chhandamna i mamawhna a hril?

Chhandamna hi sakhuana nge inlaichinna anga i ngaih zawk? Vawiin hian Isua nen in inlaichinna tinung turin eng kawng khatin nge ke i pen theih ang?

Isuan chhandamna i chang tawh em? I la chan loh chuan vawiin hian a chhandamna chang turin engin nge Isua i koh dal le?

*Vawiin hian Isua i zui dawn em?*

Pathianin a Fapa Isua Krista kaltlangin a ṭhatna a lantir tawh a. Bible chuan heti hian a ti, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan." (Johana 3:16)

Pathian thutiam anga a hnena chatuana cheng thei turin amah ring turin i inpeih em? I inpeih chuan heti hian ṭawngṭai rawh le:
"Lalpa, i hmaah ka sual ka puang a, i ngaihdam ka rawn dil e. Isua hi a Fapa a ni tih ka ring a, ka sual lak bo anih theih nan ka ai a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...