_Hmangaihna Thumal Ropui Pasarih_
- Rick Warren
- March 22, 2025
_"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)
Luka 23:42-ah khan Isua kianga an khehbeh ve misual pakhat zawk kha heti hian a ṭawngṭai, "Isu, i ram i thlen hunah min hre reng ang che" tiin.
Khang hun lai khan a thilmak tih te avangin Isua kha a lar vanglai tak a ni a. Nimahsela kha pa khan na tuar nasa hle mahse a na te tidam turin Isua a ngen miah lo. Thihna ata chhanchhuak turin Isua kha a ngen miah lo bawk.
Isua hnenah, "Isu, i ram i thlen hunin min hre reng ang che" a ti mai chauh a ni. Engvangin maw? A chhan chu a thil mamawh ber chu sual ata chhandam leh vana awmna hmun neih kha a ni tih a hre tlat. Chu chu Isuan a pe thei tih a ring tlat bawk.
Tirhkohte Thiltih 16:31-ah chuan heti hian kan hmu, _"Lalpa Isua ring la tichuan chhandamin i awm ang."_ tiin.
Chutiang anih chuan engtinnge sual ata chhandam i ni tih i inhriat ang? I thih hunin vanramah i kai dawn a ni tih engtinnge i hriat ang? Engtinnge chiang takin i sawi theih ang? Engtinnge i rinhlelhna te i paih bo theih ang?
Thiltih kaltlangin chhandamna i dawn ngei ang tih tiam i ni lo, a chhan chu i chhandamna kha i thawh chhuah theih a ni lo tlat. Kan rilru sukthlek nona vel aṭanga rawn chhuak a ni lo, a chhan chu rilru sukthlek chu a inthlak reng ṭhin a ni.
Anih chuan engin nge i chhandamna thu tichiang thei le? Pathian thuin min tiam te aṭangin. Pathianin a sawi chuan a dik tih a ni, Pathian a dawt ngai loh avangin. Pathian thuin min tiamah rinna i nghat thei ang a. Chutah chuan i chawl thei ang.
A kianga kraws lera an khenbeh ve pakhat zawk hnenah chuan Isuan heti hian a chhang a, _"Vawiin aṭangin ka hnenah Paradis-ah i awm ang"_ tiin (Luka 23:43).Chutiang chiah chuan chhandamna pek tiam i ni: "Lal Isua i rin chuan" engtik niah emaw vanramah a hnenah i la chawl ang tih Pathianin min tiam a ni.
Ngaihtuah zui atan.
Engtinnge Bible leh Pathian thutiam teah i rinna i nghat thei a ni tih i hriat ang?
Chhandam i nih theih nan Isua hi i ring tawh em? I la ring lo anih chuan vawiin hian i inpeih em?
Isua i ring tawh anih chuan Krista kaltlanga chhandamna i neih tawh avangin engtinnge i nun dan i tih danglam?
*Pathianin chhandamna pek min tiam hi i ring tawh em?*
Isua hnenah i nun hlan tura i inpeih chuan heti hian ṭawngṭai rawh le:
"Isu, nang ka rin phawt che chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.
"I hmaah ka sual ka puang a, ka Pathian leh min chhandamtu i ni tih ka pawm e. Ka Lal atan ka thlang a che. Vawiin aṭang hian ka nun zawng i ta e ni e. I hnung zui a ti tura min duh apiang tih ka duh e.
"Isu, min hmangaihna leh ka tan i inpekna, vanram min hruai thlengtu avangin ka lawm e. Ka chhandamna thawh chhuah a ngaih loh avangin ka lawm e, chu chu thil theih a ni si lo a. Ka nun zawng hi mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka ngen a che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment