_Hmangaihna Thumal Ropui Pasarih_
By Rick Warren
— March 21, 2025
“Chutichuan, Pathianin Kristaah khawvêl hi amah nên a inremtîr a, an bawhchhiatnate chu bawhchhiatnaah a chhiar tawh lo va, chu inremna thu puan hna chu kan kovah a nghat ta a ni.” [II Korinth 5:19]
January 1956 khan American missionary pangate chuan Ecuador ramhnuai thim chhah tak an pan a. Huaorani hnamte hnena kal tum an ni a, anni hnam hi hnam chanchin zir-mi [anthropologists] te chuan khawvela hnam kawlhsen leh tharum thawh hrat ber angin an sawi hial. An thlawhna an chhuahsan rual rual chuan feia khawhhlum an ni nghal ta reng a ni. Rawng taka an thahte chu Nate Saint leh Jim Elliot te niin, an chanchin hian khawvel a deng chhuak nghal thuai bawk.
Kum eng emawzat liam hnuah, Elisabeth-I leh Valerie Elliot [Jim Elliota nupui leh fanute] leh Rachel Saint [Nate Sainta farnute] chu Huaorani khuaah chuan an kal ve leh a, chu mite hnenah chuan hmangaihna leh ngaihdamna lantir an tum a ni. Rei lo teah chu hnam hruaitu leh midangte chu Kristian an lo ni ta a ni.
Elisabeth Elliot, Valerie Elliot leh Rachel Saint te ngaihdamna chuan Pathianin a ngaihdamna chu a hlimthla chauh a entir phak ang. Tichuan, Pathian ngaihdamna i chan tak hnu chuan, engtin nge midangte i ngaihdam ve ang? Heng hmeichhe paliten an tih ang hi ti ve ang che:
I mimal dikna chu kalsan ngam ang che. Hei hi ngaihdamna laimu chu a ni. Rom 12: 19 ah chuan, “Phuba la suh ula, Pathian thinurna kian zâwk rawh u,” tiin min chah. Mite chhanlet ve i chak a nih pawhin, ti suh. Phuba lakna reng rengte chu Pathian kutah dah ang che.
Sual chu thil ṭhain dawngsawng ang che. Mi i thinlungin i ngaidam takzet a ni tih chu engtin nge i hriat ang? Chu mi tana Pathian malsawmna leh khawngaihna i dil theih hun chu a ni. Bible chuan, “Ka thu ngaithlatute u, nangni zawng ka ti a che u, in hmêlmate chu hmangaih ula, a hawtu che u chungah chuan ṭhat chhuah ula, ânchhe lawhtu che u chu malsâwmna dîlsak ula, a tiduhdahtu che u chu ṭawngṭaisak rawh u,” tiin a sawi. [Luka 6: 27-28]
He rahbi hi a theih chhung chu zawm ang che. Petera chuan Isua kha zawhna a zawt a, “Lalpa, ka unauvin ka chungah thil tisual sela, vawi eng zât nge ka ngaihdam ang? Vawi sarih thlengin em ni ang?” tiin. Isuan a chhang a, “Vawi 7 a ni lo, vawi 77 zawk” tiin a lo chhang a nih kha [Matthaia 18: 22]. A chang chuan ngaihdamna chu kalpui reng [continual] a ngaih chang a awm.
Pathian ngaihdamna Chanchin Ṭha nen chuan midangte chhanchhuak rawh. Midang nangmah tinatu che i ngaihdam tawh chuan Pathian ngaihdamna Chanchin Ṭha chu zalen takin midangte hnenah i sawi thei tawh ang. Tirhkoh Paula khan Pathian ngaihdamna chang turin midangte a sawm a: “Chutichuan, Pathianin Kristaah khawvêl hi amah nên a inremtîr a, an bawhchhiatnate chu bawhchhiatnaah a chhiar tawh lo va, chu inremna thu puan hna chu kan kovah a nghat ta a ni,” tiin. [II Korinth 5:19]
Miten nangmah an tihnat tawhna che kha i la vawng reng a nih chuan, chu thinrimna chu ni liampui tawh suh ang che. I natna a lo dam leh theihna tur leh nangmah tinatu che chu i ngaihdam theihna turin Pathian ṭanpuina dil ang che.
Ngaihtuah zui atan.
Elisabeth Elliot, Valerie Elliot, leh Rachel-i ten an hmangaih em em thattute an ngaihdamna chanchin aṭang khan engnge zir tur i neih ve?
Matthaia ziaka kan hmuh angin “vawi 7 mai ni lo, vawi 77” midangte ngaihdam an tulna dinhmunah chuan i lo ding ve tawh em? Engin nge chu dinhmunah chuan chakna pe che?
Tuin nge i ṭhiante leh chhungte zing aṭang khan Pathian ngaihdamna, muanna leh chhandamna hriat mamawh?
[ *Lettu:* Peka]
No comments:
Post a Comment