_Pathian Mit Aṭanga Thlirna_
- Rick Warren
- March 15, 2025
_"Isuan kan phu ang aia nasain min thlir a. Pathian hmaa pawmtlakah min siamin chatuan nun beiseina min pe a ni."_ (Tita 3:7, CEV).
Hringnunah hian hnawl nih hi a na ber mai awm e. Nu leh pa te aṭangin a ni emaw, kawppui te emaw, zirtirtute emaw, ṭhian te emaw an ni thei, hnawl nih hian chhungril a fan nghal raih mai. Chumi chu pumpelh turin theih tawpin ke kan pen ṭhin - nu leh pa te, ṭhian te, ṭhenawm te, leh kan mi duhzawng ni miah lo te pawh tihlawm tumin kan tlawn phah ṭhin.
Kan mamawh ni miah lo pawisaa kan lei a awm a, kan mi hriatzawng ni lote kan tihlawm a ṭul hek lo. Midangten min pawm se kan tihna hian kan duhthlanna a nghawng ṭhin: kan thawmhnaw duhzawng te, eizawnna kawng kan zawh te leh kan nun dan hrim hrim te.
I naupan lai kha han ngaihtuah let teh. Miten an pawm theih nan che thil atthlak tak vawi engzat nge i lo tih tawh? Mite pawm/ngaihsak nih duhna hi kan upat rualin a bo mai bik lo- a lo khirh zual zawk chauh a ni.
Famkimna tih leh pawmna tih chungchangah hian rin dan mak tak a lo awm tawh: Ka famkim theih chuan mi zawng zawng pawm ka ni ang. Mahse chu chu a dik hauh lo.
Famkimna leh pawmna kan tih hian thil dik pathum a keng tel: Pakhatnaah chuan, tuma'n i famkim an ring lo. Pahnihnaah chuan, i famkim ngai lovang. Pathumnaah chuan, lo famkim ta pawh ni la mi zawng zawng pawm i ni lovang; Isua meuh pawh- mi famkim kha- hmuhsit leh hnawl a ni.
Mi zawng zawngin an pawm theihna tur chein engmah tih theih i nei lo. Mahse pawm nih kan la duh fan a, hmangaih nih kan duh a, miten kan hlutna min hmuhsak kan duh bawk.
Chanchin lawmawm hriat tur a awm: chu pawmna chu Pathianah, Isua kaltlangin i hmu theih tih hi.
He inhnialna hi Pathianin a chinfelna a rei tawh: _"Kan thil ṭha tih vang ni lovin a khawngaihna avangin min chhandam a. Thlarau Thianghlim thiltihtheihna kaltlangin Pathianin min silfai a ni. Pathianin a Fapa Isua Krista chu a Thlarau min rawn pe turin a rawn tir a. Isuan kan phu ang aia nasain min thlir a. Pathian hmaa pawmtlakah min siamin chatuan nun beiseina min pe a ni."_ (Tita 3:5-7, CEV).
I nunah Isua lalber tura i sawm chuan eng thil pawh lo ti tawh mahla Pathianin pawmtlakah a ngai che. I thiltih vang ni lovin a khawngaihna avang zawkin.
1 Petera 2:9 chuan heti hian min hrilh nawn, _"Mahse nangni chu Pathian thlan, mi bik in ni"_ tiin (CEV). Chu chu nun thlak danglam hlawk thei thutak a ni.
Pathianin chatuana amah nena cheng turin a sawm che a. Chu chu i hlutna lo chhuahna a ni, midangte pawmna ni lovin. Khawvelah hian mi tluklehdingawn riat vel kan awm a; mi ṭhenkhatin an lo duh lo che a nih pawhin a pawina a awm reng reng lo.
He thutak hian zalentir che rawh se. Pathianin a hmangaih ringawt lo che, a duh bawk che. I dik lohna zawng zawng hre chunga a la pawm che anih chuan engvangin nge midang pawmna i la zawn cheu ang? Sam 27:10-ah chuan heti hian kan hmu, _"Ka nu leh ka pa chuan mi kalsan ta si a, Nimahsela LALPA chuan mi la pawm ang."_
Ngaihtuah zui atan.
Midangte pawm nih i tumna lamah engtik khan nge thil atthlak tak i lo tih?
I nunah Isua i sawm tawh chuan Pathianin pawmtlakah a hmu che. Chu chuan i nunah a takin eng danglamna nge a thlen?
Vawiin hian midangte pawm nih tumin kawng te tak te i lo zawng em? Pathianin a pawm tawh che a ni tih i lantir theih nan eng danglamna nge i siam a ṭul?
[Lettu: Mapuia Fanai]
No comments:
Post a Comment