Sunday, March 16, 2025

PATHIAN HMUHAH I HLU A NI

_Pathian Mit Aṭanga Thlirna_

- Rick Warren 
- March 16, 2025
_"Choakte hi ngaihtuah rawh u, buh an tuh hek lo, an at hek lo, zem te, buh in te pawh an nei lo; nimhsela Pathianin a chawm si a; nangni chu savate ai chuan in hlut zawkzia mai chu!"_ (Luka 12:24)

Pathianin pawmtlakah a hmu che a ni mai lova; hlutna nei mi niin a hmu che. Pathianin a hmuh dan che anga nangmah i inhmuh na turin i hlutna i hriat a ngai.

Luka 12:24-ah chuan heti hian kan hmu, _"Choakte hi ngaihtuah rawh u, buh an tuh hek lo, an at hek lo, zem te, buh in te pawh an nei lo; nimhsela Pathianin a chawm si a; nangni chu savate ai chuan in hlut zawkzia mai chu!"_ Pathianin vana sava thlawk zawng zawng a ngaihlu- chungte ai chuan a ngaihlu daih zawk che!

Chuvang chuan eng anga hlu nge i nih i rin? I sum hlutna ni lovin, i hlutna kha? I hlutna kha sum leh laia i hausakna nen a inzawm lo. Lo inzawm ta se i hlutna a tla nghal duai thei. Hlutna hi kawng hnih aṭanga lokal a ni.

*1. Tunge a neitu?* A neitu nihna hian a hlutna a hril. Milarte thil neih hian hlutna tam tak a neitu nihna avangin a nei nghal duai thei. I pheikhawk ai khan infiammi, milar tak pheikhawk kha a letin a hlu nghal duai.

Tunge nei che? Bible chuan heti hian a ti, _"Pathian ta in ni"_ (1 Johana 4:4, NLT). Pathian siam, chhandam leh tlan in ni. Chu chuan hlutna thuk tak i nei tih a lantir.

*2. Miin a man pem an duh chu engnge?* Miin a man zat an pek ngamna hi thil hlutzawng tehna a ni bawk. In emaw, inkhel enna ticket emaw, lemziak mawi tak emaw te hi miin a man an pek zat ngam chiaha hlu an ni.

Eng ang chiaha hlu nge i nih? Bible chuan heti hian a ti, _"Pathianin in man sang tak a pe tawh"_ (1 Kor. 7:23), tiin. Thil man sang ber chu i man kha a ni. Pathianin nangmah tlan nan a Fapa nunna a hlan asin. He khawvelah hian nangmah chauh awm mahla i tan Isua a thi tho ang. Chutiang chu Pathian laka i hlutna a ni.

Kraws hian i hlutna a nemnghet. Pathian thil chhia a siam lova, thil chhia i ni lo. Hlutna reng i nei lo titu che chu an daw thei a ni. An ṭawngkam khan i nihna an sawi lo. Pathian thu zawkin a sawi: pawmtlak leh hlutna nei mi i ni.

Pathianin a en che kha tlanna zawng zawnga hlu ber pektlak khawpa mi hlu niin a hmu che. Chu chu i hlutna chungchanga thudik a ni.

Pathianin tawp nei lova hlu i ni a tih chuan tumahin chu chu an thai bo thei lovang. He thutakah hian chawl rawh: thuk taka hmangaih i ni, tawp awm lova hlut i ni, chatuan atan Pathian tana mihlu i ni. 

Ngaihtuah zui atan.
Tunge/engnge i hlutna hrilhfiah tura phalna i pek? Pathianin i tan tlanna man sang tak a pe tih i hriatin engtinnge i inhmuh dan a danglam?

1 Johana 4:4-ah chuan, _"Pathian ta i ni"_ tih kan hmu. He thutak hian i nunah eng danglamna nge a thlen?

Pathian hmuha hlutna tawp chin nei lo i ni- chutiang chiah chuan vawiina i mi hmuh tur te pawh hlutna nei an ni. Pathianin a ngaihhlut em avangin vawiin hian tunge a chunga i rilru put dan i thlak danglam a ṭul?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...