_Hringnun Damna Rahbi_
By Rick Warren
— March 07, 2025
“Lalpa chu ka nghak fan fan a; Tichuan, anin mi rawn thlek a, ka au chu a ngaithla ta a.” [Sam 40: 1]
Pathian chuan thlarau nun kawngah ṭhang zung zung turin a beisei lo che. A hmanhmawh emaw i ti mai thei, mahse a hmanhmawh ngai lo. Tun dinhmuna i awmnaah kha hman ṭangkai a, i nun kha siamṭhata mi chak zawk nihtir che a tum a ni. A dawhthei hle.
A lehlamah chuan mi tam berte chu kan dawhthei lo thung. Kan harsatna tam berte hi ka nghah theih loh vanga kan tawnbuak an ni. Leiba kan neih chhan chu kan it zawng hnar nachang kan hriat loh vang a ni a, kan mamawh loh kan lei a, mite hmaa lan mawi ṭul miah lovah lan mawi kan tum vang a ni thei bawk. Kan duh duh kan lei a, kan it zawng kan fawmkhawm a, kut ruakin kan awm zui ṭhin.
Ṭhenkhat chuan an chakna an hneh loh avangin mi dik lote inlaichinna an neihpui thung. Entirnan, “Kawppui ka mamawh tawh a ni, mi ṭha tak ni lem lo pawh ni se” tiin emaw “Mipat hmeichhiatna hman ka mamawh tawh, ka nghak thei lo” tih emaw a ni thei. An dawhtheih loh avang chuan buaina an neih phah ta a ni.
Thu lawmawm erawh hei hi a ni, ṭawngṭaina nen chuan i dawhtheih lohna avanga i buaina chu chinfel theih a ni. Bible-ah chuan “Lalpa chu ka nghak fan fan a; Tichuan, anin mi rawn thlek a, ka au chu a ngaithla ta a,” tih kan hmu. [Sam 40: 1]
Hei hi hria ang che: Pathian chu a hmanhmawh ngai lo. Bible-ah hian Isua a tlan hlawk hlawkna thu i hmu em? Dik tak chuan, mel thum leh a chanve leka awm a ṭhian dam lo Lazara hmu tur khan ni thum lai a thang a ni. Isua a thlen meuh chuan a lo tlai tawh a – Lazara chu a lo thi tawh a nih kha.
Mahse Isua thung chuan thiltum ropui zawk a lo nei. Lazara tihdam mai kha a thiltum a ni lo – thihna aṭanga kaihthawh kha a tum a ni. Thilmak tih a duh a ni. Chu chu a thleng ngei bawk. Isua kha Lazara thlanah a kal a, lung lum sawn turin a hrilh a, “Lazar, lo chhuak rawh!” a ti a [Johana 11: 43]. Lazara a lo chhuak ngei bawk!
A chang chuan kan khawsak phung chu a buai nuai avangin keimahni theih ang anga inchinfel ve mai a chakawm chang a awm. Mahse kawng pumpelh zawh suh. Pathian hun ruat chu ringin thilmak chu beisei ang che! Bible chuan, “Beiseina kawngah chuan lawm ula, hrehawm tuarna kawngah chuan chhel ula, Lalpa rawng bawl ula,” tiin min chah. [Rom 12: 12]
Pathian chuan thla thar, kum thar leh kum sawm lo la awm tura i nuna a hna thawh tur chu a lo hre lawk a ni. A hunruat chu a famkim a, i nuna tana a kawng ruat chu a ṭha a, nghah pawh a manhla ngei ang.
Ngaihtuah zui atan.
I nunah chuan eng thil nge thlak danglam hmasak ber atan i duh? Chutianga thil thlak danglam tur chu lo tur hmanhmawh chang i nei em?
Pathian a hmanhmawh lo a ni tih i hriatna chuan i dawhtheihna engtin nge a hruai ve?
Hahdam zawka awm a, Pathian hunruat i nghak a nih chuan i nun chu engtiangin nge a awm ang?
[ *Lettu:* Peka]
No comments:
Post a Comment