_Hringnun Damna Rahbi_
By Rick Warren
— March 06, 2025
“Tin, mite chu Mosia hnênah an kal a. “LALPA leh nangmah kalhin kan lo ṭawng ta hi kan lo sual ta a ni e, kan zînga rûlte hi tibo tûrin LALPA hnênah ṭawngṭai rawh khai,” an ti a; tichuan, mite chu Mosia chuan a ṭawngṭaisak a.” [Numbers 21:7]
I thil hloh neih letleh i tum changin ṭawngṭaina hmanga bul i ṭan chuan engtin nge danglamna a thlen ṭhin? I natna, thil chin [habits] leh buaina aṭang chuan damna i chang ṭhin.
Mi tam takte chuan anmahni chakna hmangin an buaina chinfel an tum fo – ṭawngṭaina hmanga Pathian lam hawi lovin. Chu chuan awmzia a nei lo, a chhan chu ṭawngṭaina tel lo chuan nun siamṭhatna tlo leh tluantling a awm thei lo.
Bible-ah hian thil hloh neih let leh dan entirna eng emaw zat a awm a. A entirna pakhat chu Thuthlung Hlui hunah a ni. Pathianin Aigupta aṭanga Israel mite a chhanchhuah khan kum 40 laiin Ramtiam kha an lut tlai a ni. An tlai chhan kha anmahni thiam loh a ni a. An awmna kha an duh lova, an chaw dawn – manna - Pathianin a pek kha an duh lo a ni.
Bible chuan, “Mipuite chuan Pathian leh Mosia kalhin, “Thlalêra thi tûrin engati nge Aigupta ata min hruai chhuah? Chhang awm hlei lo, tui pawh awm hlei lo; he chhang tenawm pawh hi kan nunnain a ten tawh a ni,” an ti a” tih a sawi [Numbers 21: 4-5]. An buaina chu Pathian hnenah ṭawngṭaina hmangin an thlen thei a ni. Mahse, Pathian lakah an hel ta thung.
Pathian chuan rul tur nei a tir ve ta a, mi tam tak a chuk a, an dam lo ta a ni. Israel fate chuan a tihdamna awm chhun Mosian an tana a ṭawngṭai chu a ni tih an hria a – a ṭawngṭaisak ta ngei bawk. Pathian chuan Mosia chu ruahmanna a siamtir ta bawk a nih kha. Mosia chu hetiang hian a chah, “Rûl chuk na mi, a lem siam la, banah khai rawh; tin, heti hi a ni ang a, rûl chuk apiangin chu chu an en chuan an dam ang,” tiin [Numbers 21: 8]. Tichuan chu rul lem en apiang chu an dam leh ta a!
Pathian hi Pathian a mite thil hloh pe let leh ṭhintu Pathian a ni. Dik tak chuan, Isua rawngbawlna pumpui kha mi bote zawn chhuah lehna hna kha a ni: “Mi bote zawnga chhandam tûrin Mihring Fapa hi a lo kal a ni rêng a ni,” tiin [Luka 19: 10].
Vawiin hian i bovin i beidawng a ni thei. “Hei chu a rei em mai. Hei aia thui zawk kal tawh tur ka ni. Ka zin kawngah hian ka nihna atan hi chuan ka upa mah mah tawh a ni” tih thlengin i lo ngaihtuah thei ang.
Chu chu a pawi lo! I duhna laiah khan i lo awm lo a nih chuan chu chu nangmah fuihtu a ni hlauh thei ang – i duhna hmuna kal turin i duh zawng i lam thei ang. Beidawnna chuan Pathian hlattir che suh se. Ṭawngṭaina nun neihtir zawk che rawh se.
I nunah khan i tlai tawhin hun khirh i hmachhawn a ni thei, a siamṭhat theihna chu ṭawngṭaina hmanga Pathian lam i hawi hun chu a ni mai e.
Ngaihtuah zui atan.
Buaina eng emaw avanga i beidawn lai chu han sawi teh. I chakna hmangin insiamṭhat i tum em? Nge Pathian lam hawiin i ṭawngṭai zawk? Engnge a rahchhuah chu ni ta?
Mite chuan eng vangin nge natna, thil chin dawklak, leh saltanna eng emaw aṭang chuan Pathian lam hawia ṭawngṭai lova chhuah an tum ṭhin?
I buaina Pathian hnena thlen chu hahdamthlakin i hria em? Eng vangin nge?
[ Lettu: Peka]
No comments:
Post a Comment