_Hmangaihna Thumal Ropui Pasarih_
By Rick Warren
— March 28, 2025
“I mitte chu a thianghlim êm êm a, Thil sual i en reng thei si lo va.” [Habakkuka 1:13]
Grik hote leh Rom mite thawnthua an pathian hote – Zues te, Jupiter te leh Apollo te – chuan mihring fel lohna ang kha an nei ve ṭhin. An thinrim a. Chakna sual an nei a. An dawhthei lo bawk. Ṭeka [lightning] hmanga mite an tihthih mai chang pawh a awm ṭhin. An rintlak lovin thil an ti mai mai fo.
Mahse Pathian tak tak, leilung leh van dintu chu zaa za a dikin a thianghlim thung. Thil a tisual ve ngai lo va, a thianghlimin sawiselbo a ni a. A famkim bawk. Habakkuka 1:13 chuan “I mitte chu a thianghlim êm êm a, thil sual i en reng thei si lo va,” tiin a sawi hial.
Pathian chu a famkim tlat avangin innghahna tlak a ni. A famkim tlat avang chuan sual pawh a palzam ve thei lo. Chuvang chuan, krawsah khan, Pathian, Pa, chuan khawvel sual zawng zawngte chu lain a Fapa mi famkim chungah chuan a leih baw ta a ni.
Pathian chuan Isua chu kan aiawh turin a rawn tir a. Isua khan kraws lerah i ai a awh lo a nih chuan nangmah ngeiin i sual man chu i pek a ngai thung ang. Isua chuan dan chu a tifamkim ta a ni. Rorelnain a duh dan chu a tlingtla ta a. Chu hna a tlingtlak theih chhan chu amah kha Pathian nun thianghlima nung leh sualna nei lo a nih vang a ni.
Mahse Isua tan khan a awlsam ngawt bik lo, innghaisakna a ni. Sual pakhat avanga i nawm lohna kha engtianga nasa nge a nih? Sual hrang hrang inbelhbawm vanga hrehawmna chu engtianga nasa nge ni ang – a ruka tih sual leh vantlang hmaa tihsual te, sual rapthlak takte chu? Rilru, thinglung leh thlarau tuarna leh rumna a thlen ngei ang.
Kraws-ah chuan Isua kha a rum a, “Ka Pathian, ka Pathian engah nge min kalsan” a ti a nih kha [Matthaia 27: 46]. Isua khan taksa tuarna a hmachhawn a – Pa lak aṭanga lak hran avanga tuarna te kha a hmachhawn a ni.
Pathian thianghlim khan a Fapa kha en pawh a en ngam ta lo hial a ni, khawvel sual phurtu a ni ta si a. Pathian chu a hawi sawn daih ta hial a, a chhan chu a famkim si a. Isua khan engtiang taka na nge a tuar i ngaihtuah thiam em?
Mahse chu natna chu tuar kher a duh a, a chhan chu i tan Pathian thianghlim nena inzawmna kawng a buatsaih duh vang a ni tlat.
Tu emaw chu hrem an nih a ngai, chu chu Isua khan a hmachhawn ta a ni. Isua khan i ai a awh ta a, tichuan Pathianin a en che a, i sualna lai chu a hmu ta lo a. Isua Krista thiamchanna chu a hmu hmasa ta ber a ni.
Chuvang chuan chatuan nun, nun famkim, awmze nei leh he khawvelah hian dam chhan i lo nei thei ta hial a ni.
Ngaihtuah zui atan.
• Pathian hmangaihna tih chu eng vangin nge khawngaihnaa khat tih nen an inan?
• Pathian chuan Isua chu i aiawh turin a rawn tir a – Isua chuan i sual man bat chu lawm takin a tlak a ni. Chu chuan Pathian nihna chu engtin nge a tarlan?
• Isua chu i tan tuarin kraws lerah a thi a ni tih thu chuan i tan engnge awmzia a neih?
*Isuaah chuan i la tlu lut lo a nih chuan engah nge ni dang i nghah kher ang?*
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment