Saturday, March 29, 2025

I HARSATNA LIAN BER LEH A HMACHHAWN DAN

_Hmangaihna Thumal Ropui Pasarih_

- Rick Warren 
- March 29, 2025
_"In khawlohnate chuan a ni in Pathian nen ṭhen hrang che u. In sual te avangin a hawisan che u a, in aw a hre thei ta lo a ni."_ (Isaia 59:2, NCV)

Tunlai khawvelah chuan kan nunphung tam tak zawk hian sual hi a ṭha lo a ni tih pawh an ring tawh lo. Mi tam tak chuan sual hi thil hlimawm emaw an ti zawk mah tawh!

Kan intihhlimna khawvel hi han thlir teh. TV-a kan hmuh te, _social media_ -a video tawi kan hmuh te,  leh movie-te hian sual hi nuihza/fiamthu lam lantir nan an hmang fo. Hei hi Setana thil ruahman dan a ni: Isua krawsa khenbehna ang tho kha nuihzaa i siam hi. Setana hian sual hi min hip thei turin a thuam mawi ṭhin. _Media_ velah hian sualin a rah chhuah te i hmu khat hle ang.

Sual hi eng ang chiaha duhawm lo nge anih tih i hriat duh chuan kraws en mai rawh. Isua tuarna khan i sual man engzat chiah nge a nih tih a entir.

Sual hian i nunah nghawng hrang hrang a nei! Chung zinga pathum te chu:

*Sual chuan Pathian lakah a tihrang che.* Engvangin? A chhan chu Pathian chu a thianghlim a, nang i thianghlim si lo a ni. Isaia 59:2-ah chuan heti hian kan hmu, _"In khawlohnate chuan a ni in Pathian nen ṭhen hrang che u. In sual te avangin a hawisan che u a, in aw a hre thei ta lo a ni"_ (NCV). Sual chuan inhmelmakna a siam ṭhin, Pathian nen in inkarah ngei pawh.

*Sual chuan i nunah chauhna/natna a thlen ṭhin:* Kan thiltih sual kan hriat chhuah loh emaw ka  siamṭhat loh emaw hian natna/chauhna min thlen ṭhin. Lal Davida khan heti hian a sawi, _"Ka khawlohnate chuan ka lu hi a chim pil a, phur rit tak ang, ka zawh rual loh hi a ni"_ (Sam 38:4). Suala kan awm reng hian kan rilruah dar vuak ri angin a cham reng ṭhin. Pathian dan bawhchhiat chuan lungngaihna, hlauhna, inthiam lohna leh him lo ni a inhriatna a thlen ṭhin.

*Sual chuan thiam loh a chantir che.* Pathian dan i bawhchhiat chuan hremna a awm ngei ngei- mahni inthiam lohna leh Pathian dik tak hnen aṭanga rorelna. Sam 7:11-ah chuan hei hi kan hmu, _"Pathian chu rorêltu fel tak a ni, a ni, ni tin, mi sualte chunga lungnihlohna nei Pathian a ni."_

I harsatna lian ber chu inlaichinnaa inhmuh thiam lohna emaw, i hriselna emaw, hna hmuh i harsatna kha emaw i ti a ni mai thei. Mahse a nihna takah chuan i harsatna lian ber chu Pathian nen in indo hi a ni.

Chuvang chuan i hnualin i beidawng fo ṭhin. Hei vang hian mut theih loh zan i nei fo ṭhin! I chau tawngkhawng ṭhin bawk. I Siamtu, nangmah hmangaihtu che hlata awm tura duan i ni lo. A siam che a, i tana thi turin a Fapa a rawn tir a. Amah nen lengdun turin a duh che a ni.

Vawiin hian i sual sim la - nitin sim la - Pathian nen inrem takin i awm thei ang.

Ngaihtuah zui atan.

TV, movie, lehkhabu leh _social media_ a i hmuh te aṭangin engtinnge sual i hriat?

Engtikah nge sual hi thil nuihzatthlak ang chauha i lo hmuh? Eng dawt te nge mahni i inhrilh?

Engtinnge sualin nghawng a neih nasatzia i hriatnain Pathian khawngaihna hriatthiamna a neihtir che?

*Isua ringa a hnung zui turin i la inpe lo anih chuan engvangin nge i nghah khawtlai reng ang?*

I sualna te khan Pathian lakah a ṭhen hrang che a. Khawngaihna chauhin amah nen inzawmna nun nei leh turin a pui thei che.

Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

I Siamtu nen inrem tura i inpeih chuan heti hian ṭawngṭai rawh le:

"Isu, ka sualna hian i lak ata min tihhran reng ka duh tawh lo. Nang ka rin phawt che chuan ka sualte ngaihdam a ni ang tiin min tiam a, chuvang chuan min siam chhan ka zir anga, engtik niah emaw nangin i vanramah min lo pawm ang tih ka ring.

"I hmaah ka sual ka puang a, min chhandamtu i ni tih ka pawm e. Ka sualte ka puan a nang ka rin che chuan min chhandam ang tih min tiam a. Chhandamna chu thiltih vang ni lovin rinna avanga khawngaihnaa lo thleng a ni i tih hi ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Ka nun zawng i ta e ni e.

"Min siam anga nun a, ka nun zawng hi mahni tan ni lovin i tana hman ka duh e. Ka nun i tan ka hlan a,  min chhandam a i chhungkuaa min pawm turin ka ngen a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...