Friday, February 14, 2025

LALPA, MIN PUI RAWH!

_Hringnuna Damna Rahbi_

By Rick Warren
— February 14, 2025
“Thi ngei tûra tih niin kan inhria a; mahse, mahni inring lova, mitthi kaithotu Pathian chu kan rin zâwkna tûr a lo ni a.” [II Korinth 1:9]

Hringnunah tute emaw tanpuina i mamawh chang a awm ang a. Chutiang hun a lo thlen chuan tanpuina i mamawh a ni tih i pawm hmasak zet chu a ngai ṭhin. Tichuan Pathian ṭanpuina i dil a ngai leh ang. Ṭawngkam danga kan sawi dawn chuan “ṭanpuitu ka mamawh” tih aṭang chuan “Lalpa, min pui rawh!” i tih ṭhin a ngai a nih chu. 

Paula, rinna kawnga mi ropui ber pakhat kha beidawnna khur thuk taka a tan lai khan chu tho chu a thiltih a ni. Bible lehlin thenkhatah chuan Paula chuan, “Thi ngei tûra tih niin kan inhria a; mahse, mahni inring lova, mitthi kaithotu Pathian chu kan rin zâwkna tûr a lo ni a” tiin a sawi. [II Korinth 1:9]

Han ngaihtuah chhunzawm teh. Pathian chuan mitthi tawh a kaitho thei a nih chuan nupa nun hlimna awm tawh lo, eizawnna chhe tawh, beiseina awmze nei lo leh suangtuahna [dream] bo tawhte chu a siamṭha leh thei ang. Krawsa khenbeh nun thawhlehna nuna chantir chu a thiam zawng tak a ni. Kan buaina zawng zawng a kuta kan hlan chuan thilmak a thlentir thei chiang khawp ang.  

Paula khan hetiang hian a sawi tih lo chhinchhiah la, “Engkim Pathian kutah kan hlan a ni,” tiin. A zavaiin! Tluantling a ni. “Lalpa, ka sum dinhmun siamṭha rawh,” tih emaw “Lalpa, mite nena kan inlaichinna siamtha rawh,” tih satliah mai a ni lo. I nun pumpui hlan thuhla zawk a ni – a chhe lai, a ṭha lai leh a mawi lo laite nen lam chuan. 

Chutiang chuan i nun pumpui i hlan tawh ngai em? “Lalpa, ka nun pumpui ka hlan a che – ka hna, ka natna, ka hlawhtlinna leh kan hlawhchhamna te chu ka pe a che,” tih dinhmunah chuan i lo ding tawh ngai em?

Ṭhian angin thurawn ka pe ang che: I buai viau hun nghak kher suh. Hringnun buaina chhah tak chu nghak kher suh. 

Kawng awlsam leh harsa zawk a awm thei ve ve a ni. A kawng awlsam chu eng lam en a ni a; a harsa lam chu mei sa hmachhawn chu a ni. Vanduaithlak takin, mi tam zawkte chuan kan na te chu tawrh hleih theih loh khawpa nasa a nih hunah chauh kan insiamṭha ṭhin. Pathian lam hawia amah ko tur chuan thil engkim a chhiat vek hun chu nghak kher suh. 

Bible lehlin pakhat chuan hetiang hian a sawi bawk: “I hringnun kawng zawh laiah kalna tur i hre tawh lo a nih chuan mi vannei i ni thei. Nangmah i ral zel naah chuan Pathian chuan ro a rel dawn si a” [Matthaia 5: 3] Kalsan tur thil i thlauhthlak hun chuan Pathian a lo che ve ang. 

Hengte hi a kawng chu an ni: Pakhatna, ṭanpuina i mamawh tih pawm rawh. A dawtah chuan tlawm takin Pathian chettir remti ang che. Tichuan a hnenah engkim hlan rawh – i buaina, chapona leh natna te chu – tichuan chu chuan i nun chu engtin nge a tihdanglam lo thlir ang che. 
Ngaihtuah zui atan. 

Eng vangin nge “ṭanpuitu ka mamawh” tih aṭang chuan “Lalpa min pui rawh” tih sawi chu a pawimawh? 

Paula ang khan nang pawhin engkim Pathian kutah i hlan theiin i inngai em? A nih loh chuan, engnge i kutah khan i la hum fo? 

“I hringnun kawng zawh laiah kalna tur i hre tawh lo a nih chuan mi vannei i ni thei” tih thuchah ang khian i kawng zawh tawpah chuan Pathian malsawmna i lo chang ve tawh thin em? 

*Khawiah nge i chatuan hun i hman dawn?* 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...