Saturday, February 8, 2025

I THINLUNG ZAWNG ZAWNG NEN THAWK RAWH

_I Tawpna Tur Hmuchhuak Rawh_

- Rick Warren 
- Feb 08, 2025

_"In tih apiang chu mihring tan ni lovin Pathian tana ti angah inngai ula, in thinlung zawng zawngin ti rawh u."_ (Kol. 3:23, GNT)

Pathianin i hnathawh malsawm a duh asin!

I eizawnna chu engpawh nise Pathian chibai bukna anga i ngaih chuan Pathianin mal a sawm ṭhin. Khawlai phiah fai a ni emaw sumdawnna lian tak enkawl a ni emaw, i hnathawh kha eizawnna ang chauha ngai lovin, Pathian hnena i thilpek a ni.

A awmzia chu i pu dik tak chu i chunga mite ni lovin Pathian zawk hi a ni.

Hotel-a hna thawk, Isua riahna hmun tifai angah inchan teh. A ṭha thei ang berin i che ang em? Che ang chu le! Eng hna pawh - lirthei siamṭhat hna emaw, thil zawrh emaw, naute zun-ek bawm (diaper) thlak emaw pawh nise Pathian tana ti angah inngai rawh. Kohhran siamṭhatna bul ṭantu Martin Luther-a khan heti hian a sawi, bawnghnute sawr ringawt pawh hi thinlung dik pua kan tih chuan Pathian chawimawina a ni thei.

I hnaah khan tui lo viauin i ⁹inhria em? I hnaah i thinlung a awm loh chuan i thawh lohna tur hmunah i thawk a mahna. I thinlung zawng zawnga i pek theih lohna hmuna hun khawhral nan hringnun hi a tawi lutuk. Bible chuan heti hian a ti, 

I hnathawhah i rilru zawng zawng pek i tum a i thei lo tlat anih chuan thil thlak danglam a ngai a ni mai thei. Pathianin i hnathawh kha amah chibai i bukna anga i ngaih a duh, a tan i tan malsawmna ni turin!

A hnuaia mite awmnaah hian Pathianin hnathawh mal a sawm ṭhin- 

*Ruahmanna*: Thufingte 21:5-ah chuan hei hi kan hmu, _"Ruahmanna ṭha leh thawhrimna chuan neih nunna a hring a, mahse pumpelh kawng zawn chu retheihna a ni"_ (NLT). Ruahmanna i siam a rim taka i thawh chuan Pathianin mal a sawm ang che. Pumpelh kawng i zawn fo emaw a tlem thei ang ber thawh i tum fo chuan mal a sawm lovang che.

*Bul ṭan*: Thufingte 10:4-ah chuan heti hian min zirtir, _"Kut dawngdah chuan retheihna a thlen thin a, Mi taima kut erawh chu a hausakna a thlen thin."_ Hun ṭha a rawn inher chhuah hun nghak suh - tumruhna nen hun ṭha thlentir tum zawk rawh.

*Dikna*: Kawng engkimah rinawm takin ti rawh. Thufingte 16:11-ah chuan heti hian kan hmu, _"Bûkna leh tehna dik hi LALPA ta a ni a, ip rihzawngte chu a ngaihtuah thin."_ I chhiah pe la, midangte chungah fel takin che la, dikna nunpui rawh.

*Tum bik neih*: Inpekna nen ke pen rawh. Thufingte 12:11-ah heti hian kan hmu, _"Rim taka thawktu chuan ei tur tam tak a hmu a, mahse suangtuahna mai mai umtu chuan engmah a nei lo"_ (NLT). Thil dangah inbat hnawk lovin i tum ram kha thlir ngar ngar rawh.

*Beih hram hramna*: Beidawng mai suh. Thufingte 13:11-ah hei hi kan hmu, _"Engmah lo mai maia sum deh chhuah chu tihriral a ni ang a; Thawhrimna khawl erawh chu a pung ang."_ Thawhrimna aṭanga hausakna chu a tlo ṭhin, thil eng emaw dik lo aṭanga hausa thutte hausakna erawh a ral thuai ṭhin.

Hna kan thawh chu, thinlung tak leh tum mumal tak  neia kan thawh chuan,  Pathian chibai bukna, Pathianin tam taka mal a sawm ṭhin a lo ni.

Ngaihtuah zui atan.

Tuna i hnathawh mekah khan, "i rilru zawng zawng nen" thawk niin i inhria em? Engvangin?

I thinlung zawng zawnga thawk tih hi engtinnge i lo ngaih? I hna i thlak hma khan i thinlung nge i rilru put hmang i thlak danglam a ṭul inzawt hmasa rawh.

Pathianin hnathawh dan phung mal a sawm ṭhin pangate (ruahmanna, bul ṭan, dikna, tum bik neih, beih hram hramna) i thlir letin a khawiah khian nge i chak deuh a, khawiah khian nge hmasawn i ngaih?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...