_I Tawpna Tur Hmuchhuak Rawh_
Rick Warren
10 Feb 2025
“Lalpa in Pathian ṭih nachâng in lo hriat fo theih nân sâwma pakhat, in buh te, in uain te, in hriak te leh in bâwng rual leh in berâm rual zînga piang hmasa berte chu Lalpa in Pathian hmaah, a hming awmna tûra a la ruat tûrah chuan in ei tûr a ni.”
DEUTERONOMY 14: 23
Bible hian sawma pakhat chungchanga thutiam, a chhan, a hmun leh a nî te a sawi a.
*Thutiam:* Pakhatnaah chuan, Thufingte 3:9-10 hian sawma pakhat chungchanga thutiam a sawi a: “I sumin Lalpa chawimawi la, I thil lo pung hmasa ber zawng zawngte nên; Tichuan, i buh in chu a lo khat liam ang a, I sâwrkhur chu uain tharin a luang liam ang.” Pathian chuan i lakluh hmasak berte hmanga i chawimawi chuan, mal a sawm ang che a ti a ni.
Kay-i nen kum 40 chuangta zet a kan thutlukna chu, mi leiba kan nei a nih dawn rau rau pawhin Pathian lakah hi chuan engmah kan ba tur a ni lo kan ti a. Pathian chu pek hmasak ber tur a ni a. Dollar 10 ka hlawh chuan, dollar hmasa ber chu a hnenah ka pe let a. Dollar 100 ka hlawh chuan, dollar 10 hmasa ber chu ka pe leh a. Engkim hi a hnen atanga lo awm a ni a, a malsawmna dawn zel hi ka duh a ni.
*A chhan:* Engvangin nge Pathian chuan sawma pakhat pe tura min tih? Deut 14:23 hi Living Bible chuan heti hian a ziak a: "Sawma pakhat pek chhan chu i nunah Pathian dah hmasak ber i zir theihna turin a ni" tiin. Pathian hian i sum a mamawh lo. Mahse engnge a entir tih kha a ngai pawimawh a: chu chu i thinlung a ni. Amah i rin a duh.
*A hmun:* Khawiah nge sawma pakhat kan pek ang? Hlawkna um lova thawk thin pawl thenkhat i ngainat hnenah i pe thin em? Nge i unau tu emawaw hna nei lo hnenah i thawn thin? Chutiang tur a ni lo. Chung chu thil tha ni mahse khawngaih thilpek vek an ni. Sawma pakhat erawh Pathian chibai bukna a ni. Pathian hnenah a kal tur a ni ang.
Malakia 3:10 ah chuan, “Ka inah ei tûr a awm theih nân, sâwma pakhat zawng zawng chu Thawhlâwm inah rawn la rawh u; Vân tukverhte chu hawnsak che uin, Malsâwmna dawn sên loh khawp hial Ka vûr dâwn che u nge dâwn lo che u, mi han fiah teh rêng u,” Sipaihote Lalpa chuan a ti.” a ti a. Ka in a tih chu temple emaw Pathian chibai bukna hmun a ni.
*A Nî:* Engtikah nge sawma pakhat chu i pek ang? Pathian chibai i buk hunah. Living Bible chuan, "Lalpa nî a piangin chumi chawlhkara in thawhchhuah atang chuan eng emaw in dahhrang tur a ni a, thilpek ah in hlan tur a ni. A tam lam chu Lalpain a puih che a, a thawhchhuah tir zat ang zel chein a ni ang" (1 Kor 16:2) a ti a.
Chawlhkar ni hmasa berah Lalpa hnenah i sum atangin i pek chuan, "Lalpa ka nunah a hmasa ber i ni" tiin a hnenah i puangchhuak a ni.
I chhinchhiah tur chu Bible chang hian i dah hrang tur a ni a tih hi. I lo ruahman lawk a tul. Sawma pakhat hi innawr luihna a ni lova. Ruahmanna nei la, Pathian chawimawi na atan i hmang dawn nia. I nunah malsawmna a thlen na tura a thutiam a hlen dan i ngaichang ve dawn nia.
Ngaihtuah zui atan...
Hmun dangah ni lova biakin ah Pathianin sawma pakhat pek a duh chhan engnge ni ang le?
A nihna taka sawi chuan, i lakluh atanga Pathian hnena pek hmasak tih hi engnge a awmzia?
Rinawm taka i pek zel theihna turin sawma pakhat hi engtin nge i ruahman lawk ang?
(Lettu : Msa)
No comments:
Post a Comment