Saturday, January 25, 2025

TUM NEIH KAWNGAH CHUAN MUMAL TAKIN NGAIHTUAH RAWH

_I Tawpna Tur Hmuchhuak Rawh_

- Rick Warren 
- Jan 25, 2025
_"Tichuan LALPA vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni: kan ram lamah, ka laichînte hnêna kalin ka fapa Isaaka hi nupui i neihsak zâwk tûr a ni."_ (Genesis 24:3-4)

I tum ram i thlenna tur kawnga entirna ṭha tak mai chu Eliazara nun hi a ni.

Genesis bung 24-ah chuan Abrahama, Isaaka, Eliazara leh Rebeki te thawnthuah hlawhtlinna turin rahbi pakua i hmu thei ang. Kan zirlai hmasaah chung pakua zinga a hmasa ber kan zirho tawh: Tuna i awmna kha hrechiang rawh, tih hi.

A rahbi pahnihna chu i duh tak engnge ni tih chiang taka sawi kha a ni.

Thil tum mumal lo tak chu tihhlawhtlin pawh a ni  ngai lo. Tum mumal tak i neih chuan engnge i duh tih bakah engnge i duh loh tih chiang takin i hre thei.

Abrahama khan Eliazara hmaah khan a duh chiang takin a sawi. Genesis 24:3-4 ah chuan heti hian kan hmu, _"Tichuan LALPA vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni: kan ram lamah, ka laichînte hnêna kalin ka fapa Isaaka hi nupui i neihsak zâwk tûr a ni."_ 

I nunah suangtuahna, tihpuitlin ngei duh i nei em? Heti hian mahni han inzawt teh: Engnge nih ka duh, engnge neih ka duh, engnge tih ka duh? Engvangin nge ka duh?

Engtinnge ni ang tih zawt suh. Engtinnge ni ang tih hi kan ngaihtuah nasa leh lutuk a, hetiangin: Engtinnge ka tih ang? Engtinnge a man ka pek ang? Engtinnge hun ka neih theih ang?

Hringnunah hian, duhthlanna siam hun leh harsatna sutkian hun hi hriat pawlh ngai suh. Mi tam tak chuan tum mumal tak an neih hmain an harsatna chinfel vek an tum ṭhin. Ruahmanna ṭha lo tak a ni. Buaina zawng zawng chinfel i tum zel chuan hmalam i pan thei lovang. 

Pathianin engtinnge tih zawt hmasa lova engvangin nge ni tih i zawh hmasak a duh a ni.

Engnge ni tih hriat hi a tawk hauh lo. Tum nei turin ruahmanna tam tak i siam a ni mai thei, mahse engvangin nge tih i hriat zet loh chuan i tum i puitlin ngai lovang. Hun khirh tak a lo thlenin a chhan hriat i duhna khan a chelh ṭhin che a ni. A chhan i hriat hnuah chauh Pathianin a tih dan tur a kawhhmuh ang che.

Saddleback Kohhran ka enkawl hun tawp lamah khan ṭhang khat lian zela kan thlen tur chin ruahmanna kan siam a. Chung tum ram kan siam apiang chuan engtinnge kan tihpuitlin dawn tih kan hre miah lo. Mahse chu chu a pawi lo, hmalam pana ke kan pen rual zelin Pathianin a tihdan min kawhhmuh zel. Kan hlawhtlin theihna turin kan chungah a rinawm reng a ni.

I nih duh, tih duh leh neih duhzawng te i hriat theih nan Pathian puihna dil rawh. I duh chhan hre turin zir chianna hun inpe la. Tum mumal tak nei bawk rawh.

Ngaihtuah zui atan.

Tum mumal lo deuh neiin ke i pen tawh em? ("Hriselna ṭha zawk neih ka duh a ni", emaw "Sum tak zawk khawl ka duh a ni" emaw i ti mai thei.). Chung chu engtinnge a rawn thlen?

Tum mumal tak i nei tawh ngai em? (A chunga entirna ang zulzui khian, "Kartin ni nga taksa sawizawi a tun thla hnih chhung hian ka rihna eng emaw chenah tihhniam ka duh" emaw, "Thlatin ₹5000 vel khawl zel ka duh" emaw i ti a ni thei). Engtinnge chu chu a rawn thlen?

Tunah khan engnge tum i neih. Chu chu engvanga nei nge i nih?

*Khawiah nge chatuan hun i hman dawn?*
I sualna khan Pathian lak ata a tihrang che a. Pathian khawngaihna chauhin amah nena inzawmna nei leh turin a phal che.

Bible chuan heti hian a hi, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Siamtu Pathian hnena inhlan tura i inpeih chuan heti hian ṭawngṭai rawh le:

"Isu, ka sualna hian i lak ata min la hrang tawh lo sela ka duh a ni. Nang ka rin phawt che chuan ka sual min ngaidam ang tih min tiam a, min siam chhan ka zir ang a, engtik niah emaw i chatuan van inah min la hruai ang.

"I hmaah ka sual ka puang a, min Chhandamtu i ni tih ka pawm e. Ka sual ka puan a nang ka rin che chuan chhandamin ka awm ang tih min tiam kha. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Ka Lal atan ka thlang a che. Ka nun zawng i tan ka hlan e.

"Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...