Sunday, January 26, 2025

PATHIAN THUTIAM LA RAWH

_I Tawpna Tur Hmuchhuak Rawh_

- Rick Warren 
- Jan 26, 2025

_"LALPA, vân Pathian, ka pa in ata leh ka pianna ram ata mi hruai chhuaktu leh mi betu leh, 'He ram hi i thlahte ka la pe ang,' tia, ka hnêna chhechhamtu chuan, amah ngeiin a vântirhkoh chu i hmaah a kaltîr ang a, chuta tang chuan ka fapa hi nupui i rawn neihsak dâwn nia."_ (Genesis 24:7)

Tun hnaiah Eliazaran Abrahama tirh anga a tihtur a hlen chhuah thu kan zir a. Pathianin suangtuahna a pek che, tihlawhtling thei tura kailawn pawimawh tak a kawhhmuh che a ni.

Hengte hi kan zir tawh:
Hengte hi kan zir tawhte an ni - Pathianin suangtuahna ram a pek che tipuitlin tur chuan - heng hi i tih a ngai
• Tuna i dinhmun kha hrechiang rawh.
• Engnge i duh tak tichiang rawh.
A dawt lehah chuan Pathian hnen ata thutiam i hmu tur a ni.

Pathianin Bible-ah hian thutiam 7000 chuang a nei tih i hria e - venghim tura tiamna te, hum tura tiamna te, mamawh pe tur te, hlawhtling tur te, ding nghet tur te, finna leh chakna pe tura a intiamna te hi? Heng thutiam te hi pawisa lak chhuah theihna lehkha, hman mai tura lo nghak che ang hi a ni! Mi tam tak chuan heng thutiamte hi la miah lovin hringnun an hmang -mahse nang chuan i thei!

Pathianin amah rinna nghah dan i zir theih nan hengte hi a tiam a ni. Pathian duhzawng ang suangtuahna lian tak, hmachhawp lian tak i neih a nih chuan hlauhthawnnain a tiṭhuanawp fo che tih i hria ang. Pathian thutiam i en tlat chuan i hlauhna te ni lovin a thilpek zawk i thlir ang. Harsatna emaw hei hi lo thleng ta se tih emaw i ngaihtuah reng chuan bul ṭan turin ke i pen thei ngai lovang.

Beiseinaa nen i din reng theih nan Pathian thutiam zawng rawh.

Genesis 24:7-ah chuan heti hian kan hmu, _"LALPA, vân Pathian, ka pa in ata leh ka pianna ram ata mi hruai chhuaktu leh mi betu leh, 'He ram hi i thlahte ka la pe ang,' tia, ka hnêna chhechhamtu chuan, amah ngeiin a vântirhkoh chu i hmaah a kaltîr ang a, chuta tang chuan ka fapa hi nupui i rawn neihsak dâwn nia."_

Pathianin i tum i hlen theih nan i hmaah vantirhkoh a tir dawn a ni tiin hrilh ta che sela chu chuan inrintawkna a neihtir che ang em? Tehreng mai!

Mahse vantirhkih i mamawh kher lo. A chhan chu Bible-ah hian vawi tam tak Pathianin a awmpui reng tur che tih a tiam thu kan hmu. I kalna apiangah i kiangah a awm zel ang.

I bulah Pathian a awm a ni tih i hre reng lo mai thei, mahse i kianga a awm loh lai a awm ngai lo. I kianga a awm chuan i tum i thlen theihna turin a pui dawn che a ni tih rinna a pe ang che.

Pathian lian tak i neih avangin tum lian tak i neih a ngai. I tih theih tawk a zira tum nei lovin Pathian theihna mil zawkin tum nei rawh. Pathian thutiam - 7000 chuangah te khan i tum nghat ang che.

Ngaihtuah zui atan.

Hlauhna emaw lungngaihna emaw hian i tum a ṭhelhtir tawh che em?

Tuna thlen tum i neih kha han thlir la. Kha i thil tum kha i theihna milin nge Pathian theihna milin i duan?

Pathianin a pek che ni a i hriat tihpuitlin i tumna kawngah hlauhna i hmachhawn em? Vawiin hian mahni infuih thar nan Bible-a Pathian thutiam la rawh. Chu thutiam chu i hmuh theih reng turin ziak la tar rawh!

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...