Monday, January 27, 2025

PATHIAN TANPUINA DIL LA

_I Tawpna Tur Hmuchhuak Rawh_

Rick Warren
27 Jan, 2025
“Tin, “Aw Lalpa, ka pu Abrahama Pathian, khawngaih takin vawiinah hian mi hlawhtlintîr la, ka pu Abrahama chungah chuan khawngaihna lantîr ang che.”
‭‭GENESIS‬ ‭24‬:‭12‬ ‭

Genesis 24 a Eleazara thiltih dan khan Pathianin kan duhthusam hlawhtlinna tur atana entirna tha tak a tarlang a.

He thawnthu atang leh ni liam ta thenkhata kan zir tawhte atangin, hengte hi i zir ta a-

• I dinhmun hrechiang la
• ⁠I duh diktak sawi chiang la
• ⁠Pathian hnen ata a thutiam zawng ang che.

A dawtah chuan, i duhthusam ropui tak i thlen theihna'n Pathian tanpuina dil rawh.

Genesis 24:12 ah chuan, “Tin, “Aw Lalpa, ka pu Abrahama Pathian, khawngaih takin vawiinah hian mi hlawhtlintîr la, ka pu Abrahama chungah chuan khawngaihna lantîr ang che" a ti a.

Hlawhtlinna tura tawngtai hi a pawi lo em? Pawi love, Bibleah ngei pawh a awm alawm! Kawng dang zawngin nita se? "Lalpa, min ti hlawhchham rawh"? Ka thian, chutianga i tawngtai a ngai lo. Engmah ti lo la, nuna hlawhchham i ni sa mai.

Pathian chuan i hlawhtlin a duh tehreng mai. A duh anga a siam ang i nih a duh a. Talent a pek che te i tihpun a duh a. Midangte malsawm an nih theihna turin malsawm che a duh a ni.

Mahni tana i nuna, engkim nangma tana i hmanral turin mal a sawm lo che. Pathian chuan mahni hmasial leh mahni indah pawimawh a malsawm ngai lo. Mahse midangte nangmah avanga malsawm an nih theihna turin malsawm a duh che a ni. 

Uluk takin ngaithla teh le: i hlawhtlinnain midangte a tanpui a, Pathian a chawimawi chuan, chumi tur chuan i tawngtai ngei dawn lawm ni! Pathian hian midangte i tanpui a duh a. Amah i chawimawi a duh bawk. Chuvang chuan, "Lalpa, hlawhtlinna min pe la. I duh ang ni turin min pui ang che" tiin tawngtai ang che.

I tawngtaina chuan thil pahnih a tilang:

Pakhatna, i duhna chungchangah i tihtak zia a ti lang a. Pathian hnenah i dil loh chuan i ti tak zet lo tihna a ni.

Pathianin i tihtak zia hriatna turin a tih khawtlai che i hre tawh em? A ni chuan i sawi liam mai mai, a tuka i theihnghilh leh tur a ni em tih a en a. Vawi khat mai ni lo khawp tawngtaina i neih chuan Pathian pawhin i duhna  a hmu ngei ang.

Pahnihna, i tawngtaina khan Pathiana i innghah dan a ti lang leh a. A chhan chu i tawngtai ngai loh chuan, chung thilah te chuan nangmah theihnaah i innghat a ni.

Eliezara khan a hlawhtlin theihna turin Pathian puihna a mamawh tih a in hria a. A hlawhtlinna turin a tawngtai a ni. I duthusam atan eng ang chianin nge Pathian puihna i mamawh le? I tawngtai em?

Ngaihtuah zui atan...

I hlawhtlinna atana i dil khan Pathian chawimawina turin a ni tih i hre ngai em?

I hlawhtlinna tura malsawmna i dawn khan midangte malsawmna a keng tel tih hi engnge i ngaihdan?

I tawngtainaah i ti fan fan em? Engvangin nge?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...