_Hmalam Hun Atana Inbuatsaihna_
By Rick Warren
— January 17, 2025
“Mi dang ngaih dan pawisak luat a hlauhawm a,
LALPAA innghah erawh chu a him.” [Thufingte 29: 25]
Hringnun tuifawnin a len phar vel mai maina phurrit aṭanga tal chhuak a, beidawnna leh hnualna leh lungngaihna aṭanga zalen i duh chuan i nun aṭanga mi ṭhenkhat i theh chhuah a ngai ang. Nangmah hual veltu zinga, “Tu nge nia i inhriat? I ti thei ngai lo vang. Beiseina chu dah bo rawh. A thleng tak tak ngai lo vang. I thlak danglam thei lo vang” titu che chu i hawisan a ngai ang.
I nuna i beiseina tichhe theitute chu i beng i hupsan a ngai ang – mi tam tak an ni thei. An thusawi i ngaithla a nih chuan hlauhna, lungngaina leh rinhlelhnain i khat ang. Pathianin i thinlunga beiseina a dah i umzui tur pawt dingtu che chu i hawisan a ngai bawk ang.
Pathian leh mite chu a rual chuan i lungawi vek thei lo vang! I dam chhan chu mumal taka i thlan fel a ngai ang: I ṭhiante nangmah thlirtu che chu an ni thei a, thlirtu pakhat chauh chu a ni thei bawk.
Bartimaia khan mipui zinga atanga Isua hriat tura a au chhuah chuan mite a tilawm dawn lo a ni tih a hria. Mahse a tum ve tlat a, a nun tihdanglam theih dan kawng awm chhun a ni tih pawh a hria.
Luka 18:39 chuan hetiang hian a sawi, “Tin a hmasate chuan ngawi turin an hau va; nimahsela, ani chu, “Davida Fapa, mi khawngaih rawh,” tiin an au zual sauh va!” tiin.
Mipuite chuan Bartimai-a kha, “Tu nge nia i inhriat? Isua chu mi pawimawh tak a ni a. Nangni ang mai mai chu eng atan mah a ti hauh lo ang che” an lo ti a.
Chutianga mite diriamna chu midangte aṭang ringawtin kan dawng lo. Keimahni leh keimahni pawh kan inhrilh chamchi a ni! Tichuan, setana chuan kan rilruah ngaihtuahna sual eng emaw zat a dah a, “Pathian hmangaihna chu i phu lo,” “I nihna ang ngawr ngawr kha chuan Pathian pawm tlak i ni lo,” “Pathian duh dan chu i phak ngai lo vang,” emaw “I hun kal tawha i tihsual chuan Pathian a tilawm ngai lo vang,” tihte an ni thei.
Mi tam takte chuan an beiseina [dream] neih chu umzui thei lovin miten anmahni an hmuh dan an chhut nasat lutuk avangin beiseina nei lovin khuarkhurumah an tang fo.
Bible chuan mite tihlâwm tum lutukna chu thlarau thang [spiritual trap] niin a sawi. Hetiang hian chu chu a sawi theih ang: “Mite ngaihdan venthawn lutukna chuan mi a tipiangsual a; Pathiana rinna neih chuan chu buaina aṭang chuan mite a veng” tiin [Thufingte 29: 25]
Mite hlauhna nen i awm thei a, Pathian rinna nen i hun i hmang thei bawk. Duhthlan tur i nei e!
Ngaihtuah Zui Atan
Tu ngaihdan nge i ngaih pawimawh ber?
Mite ngaihdanah buai lo ta la eng ang duhthusam/suangtuahna [dream] nge i umzui ang?
Pathianin a hmuh dan che chu eng tin nge i hriat theih ang?
[ *Lettu:* Peka]
No comments:
Post a Comment