_Hmalam Hun Atana Inbuatsaihna_
By Rick Warren
— Jan 16, 2025
“Tin Isuan a hnenah, “Kal tawh rawh, i rinna hi i dampui a ni e,” a ti a. Tichuan a hmu thei ta nghal a, kalkawngah chuan Isua a zui ta a.” [Marka 10:52]
I hmabakah khan engnge awm ka hre mai lo, mahse hei erawh ka hria: Thil pakhat hmabak i nei. Pathian chuan engtik lai pawhin rinnaa i ṭhan len theih nan a thawk reng ṭhin. Rahbi thar a awm zel ang.
I hmaa rahbi thar awm chu Isua Krista i nuna pawm leh baptisma chan chu a ni mai thei. Kohhrana i inhman pawh a ni thei, ringtu dang kawm emaw, sawma pakhat pek pawh a ni thei, rawngbawlna kal chhuah emaw, mission rawngbawlnaa inhman emaw kohhrana tel tura ṭhiante sawm pawh a ni thei ang.
I hmabakah eng kawng nge i hawi ang tih ka hre lo, mahse rahbi thar i rah erawh chu a ngai.
A nih loh chuan, khuarkhuruma eng emawah i tang mai thei. Thlan khur leh khuar danglamna chu an sei zawng chauh chu a ni. Rinnaa hmalam i pan lo a nih chuan, i thi tihna a ni ang. I thinlung a ngui ang a, Pathian chu hla ta riauin i hria ang. Rahbi hmasa ber nangmaha i rah phawt loh chuan pen hnihna, pen thumna, pen lina emaw pen ngana emaw te chu i rap ngai hauh lo vang.
Thil eng emaw ti tura Pathian ṭanpuina i dil lai chuan ani chuan, “Eng vangin nge ti tura ka tih che kha i la tih loh?” a lo ti daih mai thei. Ruahmanna eng emaw i lo nei mek thei, ruahman chu bansan la, ti phawt mai rawh.
Ni eng emaw zat liam taah khan Bartimaia chanchin kan zir a nih kha, rinnaa Isua lam pantu a ni a, Isua chuan a tidam thei niin a ngai a nih kha. Bartimaian Isua a hmuh hma chuan kawng sirah a lo ṭhu a. Isuan a mit a tihvar hnu khan, “kalkawngah chuan Isua chu a zui ta a,” tih kan hmu. [Marka 10: 52]
I nihna chu eng thu zawk chuan nge hrilhfiah ang: kawng sira ṭhu tih chuan nge kawnga Isua zui tih chuan? A eng zawk chu nge hlawhtling zawka i ngaih? A eng zawk chu nge hlimawm zawk a, hlawkthlak zawk a, lungawithlak zawk? I nihna leh chanvo atan chuan eng zawk chu nge i duh?
Isua kalkawnga zui dan chu kawng khat chauh a awm: rahbi thar rah chu.
Rinna chu mite thilsawi awih satliah a ni lo. Rinna chu Isua ngaihtuah emaw, a chanchin sawi emaw, a hminga inpekna emaw a ni satliah lo. Chet chhuah a ni a, thiltih a ni. Rinna chu thil eng emaw tih chu a ni. Dik tak chuan, Bible chuan Jakoba 2: 14 ah chuan, “Miin rinna ka nei ti mah sela, thiltih a neih si loh chuan eng nge a tan sawt ang? Chutiang rinna chuan amah a chhandam thei ang em ni?”
Bul thar ṭan turin engtin nge rinna chu i neih theih ang? A theih dan kawng khat a awm: Isua Krista.
“Nangni erawh chu ama zarah Krista Isuaah chuan in awm a ni; ani chu Pathian hnen ata tan finnaah siam a ni, felnaah te, thianghlimnaah te, tlannaah te nen,” tiin [I Korinth 1: 30]
Bartimaia chuan a nunah thil ropui tak a thleng dawn tih kha mi ni khan a hre kher lo vang. Atan chuan ni dang ang mai a ni. Mahse Pathian chuan hun ṭha a beisei hauh loh a thara bul ṭan lehna hun a pe a nih kha.
Pathian chuan chutiang hun ṭha chu a pe che. Hun ṭha chu khawhral suh. Hun ṭha a liam hma chuan rinna kawngah chuan rahbi thar chu rap ang che.
Ngaihtuah zui atan.
*Vawiin hian kalkawng sirah i ṭhu nge Isua chu i zui zawk?*
Rinna kawnga rahbi thar rap tur chuan eng dang nge i la nghah? Hun khawhralna atan eng chhuanlam nge i siam?
I tana rahbi thar awm thei chu i nuna Isua pawm chu a ni em?
Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh.
I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e.
Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria.
“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment