Saturday, January 11, 2025

RAHBI HMASA BER RAP RAWH

_Hmalam Hun Atana Inbuatsaihna_

- Rick Warren 
- Jan 11, 2025
_"Tin, heti hi a ni ang a, Lalpa leilung pum pui Lalpa bâwm zawntu puithiamte kephah chu Jordan tuia a innghah veleh chuan Jordan tui, chhak lam atanga tui lo luangte chu a chat hlauh ang a tichuan a lo inhlawm ding luah mai ang"_ (Josua 3:13)

Pathianin a siam dan che ang zela ni tura a duh che ni tur leh, ti tura a tih che ti tur leh, nei tura a duh che nei thei turin huaisen taka rinnaa ke i pen a ngai a ni.

Josua leh Israel faten Jordan lui kan a Ramtiam an luhna turin Pathianin vawi thum lai chak tak leh huai taka awm turin a fuih: _"Chak tak leh huai takin awm rawh . . . chak tak leh huai takin awm phawt mai rawh . . . chak tak leh huai takin awm rawh."_ (Josua 1: 6, 7, 9)

Josuan Pathian remruat a tihpuitlinna tura hlauhna leh beidawnna a hneh theihna turin Pathianin fuihna thu ngai a hrilh nawn fo. Nang pawh chutiang chu i ni. Hlauhna hian Pathianin i kawng a ruat lak ata a hruai bo ṭhin che. Beidawnna/hnualnain chu ramtiam thleng thei lo tur chuan a siam ṭhin che.

Mahse Josua ang khan huaisen takin hmalam i pan thei ang, a chhan chu:

*I hnenah Pathian a awm.* I paltlang tur i hre miah lo, mahse i hnenah Pathian a awm tih i hre thei. Josua 1:5-ah heti hian kan hmu, _"I dam chhûng zawng tumah reng rengin an chelh lo vang che: Mosia hnena ka awm ang khan i hnenah pawh ka awm ve dawn e: ka tithlâwn lovang chia, kal pawh ka kalsan tawp lo vang che."_ 

*A thutiamah Pathian a ding nghet.* He thudik hian inrintawkna a pe thei che. Josua 1:6-ah heti hian kan hmu, _"Chak tak leh huai takin awm rawh: an thlahtute chhechham pêk ka lo tiam tak ram kha, hengho hi i luahtir dawn si a."_ 

*Pathianin ti turin a ti che.* Josua 1:9-ah heti hian kan hmu, _"Thu ka pe che a ni lawm ni? Chak tak leh huai takin awm rawh; hlau suh la, zam hek suh: LALPA i Pathian chu i kalna apiangan i hnenah a awm zel dawn alawm."_

Josua leh Israel faten Jordan lui an thlen khan Mosia kaltlanga luipui vuah chaha a awm ang khan Pathianin lui a tihchahsak an beisei ve ngei ang. Mahse tun ṭumah chuan kawng dangin a che tlat. Pathianin heti hian a ti, _"Lalpa bâwm zawntu puithiamte kephah chu Jordan tuia a innghah veleh chuan Jordan tui, chhak lam atanga tui lo luangte chu a chat hlauh ang a tichuan a lo inhlawm ding luah mai ang."_ (Josua 3:13)

Hei hi kan zir theih chu a ni: Rahbi hmasa ber hi a hlauhawm (chakawm loh) lai ber a ni ṭhin. Pathian thil mak tih i hmuh theihna tur chuan rinna nena rahbi hmasa ber i rah a ngai ṭhin.

He zawhna hi han inzawt teh. I Jordan lui engnge ni? Heti hian sawi ila, i tum ram thleng tura i paltlang tur harsatna kha engnge ni?

Pathianin ti tura a tih che i hlauh avanga i tih loh engnge awm? Pathianin heti hian a ti, "Chak tak leh huai takin awm rawh." I hnena a awm a, a thutiamah a ding nghet a, ti turin thu a pe che a ni. Tunah chuan i ke pen hun a nghak a ni. 

Ngaihtuah zui atan.

Engin nge thlaler ramah tantir che? Pathianin ke pen tura a tih lai che a ke pen thei lo tura siamtu che engnge ni?

Rinnaa ke pen turin engnge ngai ang?

Rahbi hmasa ber rinna nena i rah khan i nunah eng thil mak nge Pathianin a thlentir ang?

*Khawiah nge chatuan hun i hman dawn?*

Isua Krista kal tlanga chhandamna a rawn thlen hi Pathian thil phalzia lanna a ni. I sualna khan Pathian lak ata a ṭhen hrang che a. Isua kaltlanga Pathian khawngaihna chauh hi Pathian nena zawm leh theitu che a  ni.

Bible chuan heti hian a hi, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Siamtu Pathian hnena inhlan tura i inpeih chuan heti hian ṭawngṭai rawh le:

"Isu, ka sualna hian i lak ata min la hrang tawh lo sela ka duh a ni. Nang ka rin phawt che chuan ka sual min ngaidam ang tih min tiam a, min siam chhan ka zir ang a, engtik niah emaw i chatuan van inah min la hruai ang.

"I hmaah ka sual ka puang a, min Chhandamtu i ni tih ka pawm e. Ka sual ka puan a nang ka rin che chuan chhandamin ka awm ang tih min tiam kha. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Ka Lal atan ka thlang a che. Ka nun zawng i tan ka hlan e.

"Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...