Friday, January 3, 2025

INPUANNA HIAN INZAWMNA A THLEN THIN

_Beiseina Bulpui_

Rick Warren
3 Jan 2025
“In khawlohnate chu nangni leh in Pathian kâra tlain a tiṭhen zâwk che u a, benga a hriat duh lohna tûrin in sualnate chuan a hmai chu a hliahsak bawk che u a ni.”
‭‭ISAIA‬ ‭59‬:‭2‬ ‭

A ruka sual inhriatna tluka min tirethei tu hi a awm kher lo maithei. Kan tihsual kan vawn reng hian, midangte hriatchhuah kan hlau a, min ti zamin, min ti hah a, kan hlim thin lo a ni. Mahni inthiamlo chung hian a hlim theih loh.

Chutiang zelin, hmaikawr kan vuah a. Kan chhungrilah phum bova, thup bo kan tum thin a. Kan tihsual ngaihtuah lo turin thil tih emaw, hna thawh emaw, kawppui neih emaw hmanga mahni intihbuai kan ching thin.

Eng thil pawh tisual la- i sualna, i inchhirna, i hlawhchhamna - chu i inthiamlohna zawng zawng chu a tuk thlenga i hnuh zel a ngai lo. Thlauh daihin, Pathian hnenah felfai takin i rawn kal thei a ni.

Engvangin nge kan felfai a tul? A chhan chu inthiamlohna hian Pathian lakah min thenhrang thin.

Pathian lak atangin hla riau emaw, thlauhthlak daih emaw, in zawm ta lo riauin i inhre thin em? I tawngtaina te chuan inchung pawh pel mang lovin, Pathian chu mel tam taka hlaah awm daihin i hre thin em?

Pathian chu a ngai rengin a awm. Nangmah zawk kha i kalsawn a ni.

Isaia 59:2 chuan, “In khawlohnate chu nangni leh in Pathian kâra tlain a tiṭhen zâwk che u a, benga a hriat duh lohna tûrin in sualnate chuan a hmai chu a hliahsak bawk che u a ni" a ti a. Sual avanga inthiamlohna  chu bawlhhlawh chhekkhawm anga tam Pathian leh nangma inkararah a awm chuan, amah va pawh thei lo turin a dang thin che a ni. A thenhrang che a ni.

I ina bawlhhlawh kha i paihfai zing em? Kum khatah vawi khat chauh? A nih loh ka beisei! A nih vaih chuan i in chu a rimchhe viau ang. Mi tam tak chuan nitin a nih loh pawhin, an bawlhhlawh hi nitin deuhthawin an paihfai thin.

Pathian nen in inkar felfai taka vawn zir a ngai a ni. Tlai tin mai khan, Pathian hnenah hetiang hian zawt la, "Kan inkarah eng bawlhhlawh nge lo awm le? Ka hriat theih lohna tur che leh i rawng ka bawl theih lohna turin, ka hmangaihna che dalin eng bawlhhlawh nge awm le?". Tichuan paihfai thin ang che. Pathian hnenah puang la, kalsan ang che.

A tuk atan nangmah tichau thei khawp inthiamlohna kha phurh zawm zel i duh hauh lovang. Engah rawn la chhuak la, Pathian chuan a khawngaihin zawkin lo khuhbo rawh se.

Ngaihtuah zui atan...

I sualna kha engtia tam nge i puan thin?

I sualna i puan hnu khan i inthiamlohna kha engtia tih zel nge Pathianin a duh?

Thlarau Thianghlim chuan Pathian nena in inpawhna daltu engnge a hrilh che? I chiang lo a nih chhan, Rom 8:26 kha han chhiarin engtin nge a sawi han en chhin teh le.

*Tupawh Krista Isuaa awmte tan chuan thiamloh chantirna reng a awm tawh lo* 

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...