Beiseina Bulpui
By Rick Warren
— January 02, 2025
“Thinrim bân la, thinur sim rawh, Intihrehawm duh suh, thil sual i tih phah dah ang e." [Sam 37:8]
Thil chi hrang hrang min tinatu an awm a. Tuten emaw dawt an hrilh vang che emaw an thutiam an hlen loh vang emaw an hnawl vang che emawin i na a lo ni thei. Miten an phatsan che emaw an hrethiam lo che emaw i beidawng emaw i khawhar emaw a ni thei.
Davida chuan Sam 109: 22 ah hetiang hian a sawi, “Ka thinlung hi a na em em thin,” tiin a sawi. Rilru natna hi taksa natna aia a nat zawk chang a awm fo, a dam fel chhung a rei zawk hial thei. Kan thinlung natna te phei chu tihdam a harsa em em zel a ni.
Entirnan, i naupan laia infiamnaa i inhliamna leh pem leh serte chu a chhan tak tak i hre vek kher tawh lo vang. In ṭhenawmte emaw i chhungkhat hoten an ṭawngkam dengkhawng tak tak avanga i natnate chu i la hre ran mai thei. I la hre reng a, an la tina reng thei hial che.
Kan rilru natnate chu rei tak kan pai fo, a chhan chu kan rilruah kan ngaihtuah nawn fo ṭhin vang a ni. Kan natna chu kan lo ngaihtuah nawn fo ṭhin a ni.
Hun kal tawh chu thil liam tawh an ni. Hun liam tawha nangmahni tinatu che chuan nangmah duhthlanna tel lo chuan an tina nawn thei tawh lo che. I thinlung natna i ngaihtuah nawn apiangin hun kal tawha tu emaw chu tun thlengin an tihnant nawn che i phal tihna a ni.
Natna la hriat fo chu khakna/thinrimna [resentment] a ni. Chu chu “tina nawn” tihna a ni. Thil eng emaw avanga natna i neih apiangin nangmah leh nangmah i intinaleh tihna a ni a. I hliam chu i tina nawn a. I natna chu i titharleh tihna a ni.
Duhthlang thei i ni e. I hun kal tawha natna chu i thlah liam a nih chuan an tina nawn thei lo vang che.
Sam 37:8 chuan “Thinrim bân la, thinur sim rawh, intihrehawm duh suh, thil sual i tih phah dah ang e," tiin min chah.
I hun liam tawha natna i neih chu i la thlah liam lo a nih chuan Pathianin i tana a kawng ruat leh hmasawnna chu i chang thei ngai lo vang. Thinrimna leh khakna nun neih chu lirthei hnung lam en chunga lirthei khalh ang a ni. Tawhsual i la tawk ang! Hun kal tawh avanga natna i nei a nih chuan hmalam i thlir thei ngai lo vang.
Hun liam tawha natna i neihte chu i thlahliam an ngai. Hun liam tawha i natnate chu engtik niah emaw an lo la lang leh ang. Chutiang a nih chuan, thil dang han ngaihtuah teh. Hmalam thlir rawh. Pathian hmangaihna leh ngaihdamna te leh a lainatnate chu ngaihtuah nawn ṭhin ang che.
Thinrimna/khakna i pai mek kha kalsan a, i nun tana Pathian thutiam chang tura hmalam pan a hun ta e.
Ngaihtuah zui atan
I hun kal tawha rilru natna i la pai, i kalsan mai theih loh chu engnge ni?
Nangmah tina ṭhintu che laka damna chang turin Pathian Thu aṭanga ṭanpuina chu engtin nge i chan theih ang?
Hun kal tawh thlir tura thlemna i tawh lai chuan engtin nge i tana Pathian hmangaihna leh thutiam chu i chan theih ang?
[ Lettu: Peka]

No comments:
Post a Comment