I Tawpna Tur Hmuchhuak Rawh
By Rick Warren
— January 31, 2025
“Hei hi Nova thlahte chanchin chhuina a ni. Nova chu mi ṭha a ni a, a dam rualpuite zîngah sawisêl kai lo awm chhun a ni. Nova chu Pathian nên an lêng dûn ṭhîn.” [Genesis 6: 9]
I hmabak tih tur - Pathianin hmathlir, i tum-ram [dream], suangtuahna, tih tur - a pek che tihlawhtling tur chuan mite tih dan lo anga i chet ngam a ngai ang.
Chu chu i chinfel zet hma chuan i tum-ram [dream] chu i thleng ngai lo vang. Mite tih dan ang thova khawsa chung chuan thil i tihdanglam tak tak thei hek lo vang. Duhthlanna i siam fel a ngai: "Mite tih dan lo anga tih i inhuam a ngai, a chhan chu mite khawsak dan chu lehlam hawi zawng a nih laiin Pathian chuan kawng dang daih a hawi thung.
Nova hun lai kha mihringte dinhmun a hniam lai ber a ni thei hial ang. An rilru kha sual leh hlemhletnain a khat vek a ni.
Genesis 6: 12 chuan hetiang hian a sawi a: “Khawvêl chhiat tâkzia chu Pathian chuan a hmu a. Ngai teh, leia mi tin a sual zâwng hlîrin an khawsa a ni,” tiin.
Kan lo hre sa mai em? Genesis 6: 5-6 chuan hetiang hian a nemnghet: "Lalpa chuan leia mihring sual nasatzia chu a hmu a, eng lai pawhin thil sual hlîr an ngaihtuah a ni. Leiah mihring a siam ta chu pawi a ti a, a rilru a na hle a," tiin.
Mihring chhuan sawm hnu lek khan khawvel chu sualna leh thil dik lovin a lo khat leh ta a ni.
Vawiin hian engnge khawvel hawi zawng ni ta? Khawvel hi Pathian lam hawiin a pen zel nge, a hawisan zawngin a kal zawk? Isua chuan, "Nova hun laia thil awm dân ang khân Mihring Fapa lo kal ni-ah pawh a la awm ve ang," tiin min chah thung. [Luka 17:26]
Krista hi a lo let leh hma chuan kan khawtlang nun [culture] chu a chhe lam zel a ni tawh ang.
He hun thim tak karah hian Pathian chuan eng pakhat a hmu a, chu chu Nova a ni. Chu chu hetiang hian a sawi theih ang. Genesis 6:8 "Nova erawh chu Lalpa chuan a ngaina hle a." tiin a sawi.
Thumal "mahse Nova chuan" tih khan khawvel a chhandam a ni. Pathian chuan i rinawmna avang chuan khawvel chu a chhandam ve thei ang em? He khawvel sual tak Pathianin a thlir chang chuan Pathian chuan "mahse" tiin nangmahah chuan beiseina neiin i hming chu a sawi ve ang em?
Pathian chuan nangmah kaltlangin khawvel a chhandam ve ang em? Mi pahnih chauhin khawvel hi an lo chhandam tawh a: taksa chhandamna Novan a thlen a, thlarau chhandamna erawh Isua kaltlangin a ni. Nova nen inlaichinna in nei. In chhungkaw thlah kal zel kha han chhuilet la, Nova i hmu chhuak thei ang.
Nova kha midangte atangin engtiangin nge a danglam? Midangte ngaihdan, mite fakna, leh duh danah a buai ve ngai lo. A kawng rel fel turin mite khawsak dan lo ang khan a khawsa ngam mai zel a ni. Nang pawh chutiang chuan i khawsak ngam a ngai ang. Mipui huhang mila i lo thle kawi ve zel a nih chuan i nuna Pathianin ti tura a duh che chu i tihlawhtling thei ngai lovang.
Mi ropuite chu mite pen dan lo angin an kal ngam thin. Anmahnia din pawhin an ngam ṭhin Hei hi hria ila: mite tih dan lo anga khawsa turin i danglam a ngai.
Hei hi Pathianin a duh dan che chu a ni: I nun kha lo thlir che sela hlim takin "khung mite khu ka fate an ni" tiin sawi ang em? Nova ang khan dik tak leh belhchian dawlin nung ang che. I danglamna chuan thil tidanglam rawh se.
Ngaihtuah zui atan.
• Mite duh dan kalh zawnga Pathian remruat kawng zawh turin nangmah lam kha engtin nge i lo inherrem ang?
• Tun lai khawvelah hian dik taka nung tur leh Pathian ruahmanna tihhlawhtling turin engtiang taka nun harsa nge a nih?
• Mipui ngaihdan kalha kal a ngaihna hmunah chuan i nuna Pathian thiltumte hlawk zawkin engtin nge i hlenchhuah theih ang?
[ Lettu: Peka]

No comments:
Post a Comment