_I Tawpna Tur Hmuchhuak Rawh_
By Rick Warren
— January 30, 2025
“Tin, Abrahama chhiahhlawh chuan tangkaraw incheinate leh rangkachak incheinate leh silhfênte a la chhuak a, Rebeki chu a pe a; a nuṭa leh a nu pawh chu thil hlu takte a pe bawk a.” [Genesis 24:53]
Vawiin hian a Eleazara chanchin – a hna a hlen a, a pu Abrahama fapa Isaka tana nupui a hmuh tak thu kan zirlai mek chu kan lo zo dawn ta a ni.
Kan thiltum [goal] thleng tur chuan eng emaw kan zir chhuah a ngai a ni tih kan hria, chungte chu:
• Tuna i awmna chhut rawh
• I thil duh hre chiang rawh
• Pathian thutiam chu zawng rawh
• A ṭanpuina dil rawh
• A harsatna lai zawng chhuak rawh
• A rahbi indawt te tein ruahmanna siam rawh
• Dawh thei leh chhel takin awm rawh
A tawpna rahbi chu hengte hi an ni: nangmah ṭanpuitu tur pawl [team] din la, tichuan a man pek huam ang che.
Pakhatna, ṭanpuitu tur team din rawh. I hmathlir [vision] te chu nangmah mai chuan i hlen chhuak ngai lo vang. Hlawhtlinna chu mimal thiltih a ni ngai lo. Midang pawh i teltir thiam ve a ngai ang. Thawhhona leh inlungrualna a awm a ngai.
African thufing pakhat chuan, “Chak taka kal i duh chuan nangmahin kal la. Thui tak kal i duh chuan midang thurualpui nei rawh,” tiin a sawi.
Chu chu Eleazara khan a ti a ni. Rebeki unaute leh chhungte kha amah ṭanpui turin a sawm a nih kha. A bul vela mite ṭanpuina a dawng bawk.
Bible chuan: “Tin, amah maia awm kha chu miin hneh thei mah sela, pahnih chuan an lo dodâl zo dâwn a ni; hrui thum hrual chu a chat lawk lawk ngai lo ve,” tiin a sawi. [Thuhriltu 4: 12]
I hmathlir tihlawhtling tura i tih ngei ngei ngai chu hei hi a ni: A man i pek huam a ngai. Thil eng emaw ti tur chuan a man a inbithliah zel a; i thiltum zawng zawngte chuan a man bithliah an nei vek.
Bible chuan Eleazaran a man pek a huam thu a sawi: “Tin, Abrahama chhiahhlawh chuan tangkaraw incheinate leh rangkachak incheinate leh silhfênte a la chhuak a, Rebeki chu a pe a; a nuṭa leh a nu pawh chu thil hlu takte a pe bawk a.” [Genesis 24:53]
Thiltum [goal] ropui chuan inpekna sang tak a phut. Nangmah leh nangmah kha han inzawt teh, “Engnge a man ni dawn? Engnge ka pek ngai ang? A man hian a phu em?” tihte chu.
Thurawn eng emaw ka han pe ang che. Midangte hlawhtlinna chu a man engtianga nasa nge an pek tih chhut hmasa lovin lo it ve ngawt zel suh. An thil tihhlawhtlin avang chuan an hriselnain a lo tuar thei a, an chhungkua emaw an zahawmna pawh an lo hlan thei. Pathian pawh an lo kalsan hial thei a ni.
Thil ṭhenkhatte hi chu kalsan mai pawh a awm viau thei. Mahse a aia thil ropui zawk nei tura thil ṭhenkhat hlan [sacrifice] a ngaih chang a awm bawk.
Ṭhiante u, ka thil hmuh chhuah pakhat chu “second class” thil atana “first class” inpekna nena tlan ngat ngat an awm chu a ni. “First class” thil atana inpekna “first class” pe turin ka fuih duh che u.
I nun tana i thil tih theih sang ber chu thil tlo umzui chu a ni. I hma lam hun chu i tana hun ṭha ber lo ni zel rawh se.
Ngaihtuah zui atan.
I nunah khan nangmah ṭanpui theituten an hual vel che nge nangmahin i mal kal ngawk?
Vawiina i thiltum [goal] uma i tlan lai mek khan a man pek ngai eng nge awm thei ang? I Inpekna nen chuan a inphu tawk em?
Tu emaw an inpekna leh an thiltum inphu tawk lo chu i lo hmu tawh em? Thil ropui tak atana inhlanna chu i lo hmu ve tawh em?
[ *Lettu:* Peka]
No comments:
Post a Comment