_Beiseina Bulpui_
- Rick Warren
- Jan 05, 2025
_"Kan nunna hlum belah hian he Thuchah ropui tak hi kan kawl a ni. Chu chu Pathian thiltihtheihna tehkhin rual loh nena min hriat pawlh loh nan a ni."_ (2 Kor. 4:7, The Message)
He hringnun intlansiakna kawng thui tak mai rinawm taka zawhtute chu tlawmna nun neitute an ni. Anih leh mahni inphah hniam/ tlawmna nun neih kan tih hi engnge a awmzia?
I nihna anga i lan chhuah kha a ni mai. I chak lohna, i tih theih chin leh i famkim lohna lai zep lova i lantir/sawi chhuak mai kha a ni.
Thuruk ka hrilh ang che: Mi zawng zawngin i famkim lo tih an hria! Engkim i tithei ni a i inngaih kha bansan rawh, i ti vek thei miau hek lo. Tumahin engkim an tithei vek lo. Tihsual leh chak lohna nei lo anga kan awm ṭhin hi kan bansan vek thei.
Inngaihtlawmna hi mahni inen hniamna erawh a ni lo. Mi ṭha lo leh ṭangkaina reng nei lo anga inngaih tur tihna a kawk lo. Ama anpui te tan Isua a thi a. Chu chuan i hlutna a lantir! Hlu lo la i tan Isua a thi tawp lovang.
Inngaihtlawmna chu mahni inhmuh hniamna emaw kan chakna hnawlna emaw a ni lo. I chak lohna te tlang taka i lantir kha a ni.
Kan vai mai hian chakna leh chak lohnaa phuar vel kan ni. Kawng ṭhenkhata ka chak viau laiin kawng ṭhenkhatah kan chak lo viau bawk, nang pawh i ni. Tlawmna nun kan tih chuan heng chakna leh chak lohna te thup lova lantir hi a ni.
Tlawmna nun kawng khatah chuan mahni innuih theih hi a ni. Nuihzatna (humor) tih leh tlawmna (humility) tih hi ṭawng mal thuhmun aṭanga lak a ni tih i hria em? Mahni i innuih theih chuan mahni chunga rilru hrisel pu i ni tihna a ni thei.
2 Kor. 4:7-ah chuan heti hian kan hmu, _"Kan nunna hlum belah hian he Thuchah ropui tak hi kan kawl a ni. Chu chu Pathian thiltihtheihna tehkhin rual loh nena min hriat pawlh loh nan a ni."_ (The Message)
Hlum bel ang mai ni mahila Pathianin a ropuina leh a thiltihtheihna keimahniah a dah a ni. Hlum bel chu awlsam takin a keh thei. Hei hi kan hriat chian em emna chhan chu eng emaw ti taka keh chhe hlek tawh vek kan nih vang a ni. Mahse chung chak lohna chu kan thup kher a ngai lo. Pathianin mi chi hrang hranga min siamnaah hian nuihna leh hlimna tur zawng ila thil ho te te chu i liamtir ang u.
Saddleback kohhranah pastor senior ka nih tawh hnu khan thawktute zingah heti hian ka sawi ṭhin, "Pathian hi la thutak rawh, mahse nangmah kha inla thutak suh" tiin. Chu chu rilru hahna hneh dan kawng khat a ni. Hahdam taka i awm a mihring i nihna i pawm a, mahni i innuih fo ṭhin khan rilru hahna a chhawk ṭhin ang che.
I chak lohna te i hriat khan rilru hahna a chhawk ang che ang a, Pathian leh midangte chaknaa innghatin hun liam ta a i famkim lohna te laka ata hmasawn turin a pui ang che.
Ngaihtuah zui atan.
Midangte an hnuh hniam che nghak lovin engvangin mahniin tlawmna nun neih i thlan ang?
I chak lohna te i pawm tawh em? Engvangin nge a pawimawh?
Kan chak lohna te hian engtinnge Pathian chakna min zirtir?
[Lettu: Mapuia Fanai]
No comments:
Post a Comment