_Beiseina Bulpui_
Rick Warren
Jan 6, 2025
“Chutichuan, chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a.”
HEBRAI 12:1-2
Eng kal darh hian chakna a nei lo. Mahse enlenna hmanga ding taka eng a kal erawh chuan thil a ti kang thei. Chu ai maha hlawma a kal phei chuan thir hial pawh a kang chat thei a ni.
Chutiang bawkin, i nun kha hlawm tha taka a kal chuan awmze nei zawk i ni ang.
Mahse englam nge i thlir tih kha a pawimawh ta a ni. Kristian nun thiltithei chuan ei zawnna te, sum lakluhte, hlawhtlinnate, harsatnate a thlir lova. Engvangin maw? Chung chu rei daih lo tur a nih vang a ni. Hun rei lote chhung thil vek a ni. An ral leh vek ang.
He khawvel thila rilru dah ai chuan, thil dang pahnihah dah la: Isua Krista leh a nun dan bakah Vana i tawh huna i lawmman hmuh tur te.
Ngil taka hringnun zawh tur chuan tawrhchhelna a ngai viau. Chumi hlawhtlina chu thil thlir danah a innghat. Engvang nge kan tih hian engtia rei nge tih a hril fova. Engvanga tinge i ni tih i inhriat khan, kal zel turin phurna i nei thin a ni.
Kristian tam tak hnungtawlh na leh an intlansiakna an hlen loh thin chhan chu hei hi an theihnghilh thin vang a ni. Engvanga Bible chhiar nge, engvanga inkhawm nge, engvanga rawngbawl nge tih an in hre thin lo.
Kan tih thin chhan chu hengte hi kan thlarau thanlenna tur leh chatuan atana min buatsaih tute an ni. Chatuana nung tur kan nih leh tun atan chauh a ni lo tih kan hriat hian, min tibuai theite an tla bo then zel a. Kan thlir tur kan thlir a tul a ni.
Kum 40 chhung pastor hna ka thawh lai khan vawi engzata tam nge ban ka duh i hria em? Thawhtan zing tin kha a ni deuh ngawt mai. Ka zam thin a, "kei aia ti tha thei an awm ngei ang mawle" ka ti thin. Mahse ka kal zel a, a chhan chu Isua tana zawh that leh chatuan enga nun ka duh vang a ni.
Hebrai 12:1-2 chuan, “Chutichuan, chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a" a ti a.
Zawh thatna atana pawimawh chu thlir tur dik thlir tlat a ni. Pathian en la. Chatuan thlir la. I lawmman tur en la. Hlen zawh that kha tum rawh.
Ngaihtuah zui atan...
Engnge i nun khan a thlir ber? Chu chu dik nia i hriat chhan engnge? Miten engtin nge an sawi ve?
Intlansiakna tha taka zo thei turin vawiin hian engnge i thlir tur le? Engnge i tih theih le?
Engtin nge kohhrana i telna khan chatuan nun atan a puih che?
(Lettu: Msa)
No comments:
Post a Comment