Friday, December 13, 2024

RINNA CHU PATHIAN HNENA LAWMTHU HRILH LAWK A NI

_Hnuhma Chhinchhiahtlak Hnutchhiah_

By Rick Warren
— December 13, 2024
“Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang.” [Marka 11:24]

Rinna chu Pathianin thil a tithei a ni tih rinna chu a ni mai. Rinna chu Pathianin thil a ti dawna ngaihna satliah a ni lo thung. Rinna chu Pathian hnena lawmthu lo sawi lawkna a ni ber. 

Isuan, “Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang,” tiin a sawi [Marka 11:24]

Thil eng emaw i dawn hnua Pathian hnena lawmthu sawi chu lawmthu sawina a ni a. Thil a thlen tak tak hmaa lawmthu lo sawi lawk erawh chu rinna a ni thung. 

Thinlunga lawmna chu a ṭha a, a dik bawk. Mahse i hmabaka awm chu rinnaa ṭhanlen zel chu a ni. Chutianga ti tur chuan Pathian hnena lawmthu lo sawi lawk a ngai ṭhin. 

Tunah hian check cheng maktaduai khat hu lo pe dawn ta che ila pawisa [cash] a i chantir hunah chauh em ni lawmthu min hrilh ang? Aih! Lawmthu min hrilh nghal ang. Mahse pawisaa i chantir tak tak hma chuan i ta a ni mai chuang lo vang, a chhan chu check chu thutiam [promise] ang chauh a ni. Chu check chu ka pe che a nih chuan, “Pu Rick ka lawm e” i ti ang. Ka rintlak a ni tih i ring ang a, ka bank-ah chuan chutiang zat pawisa fai chu a awm a, ziaka tiam a nih ang chuan cheng maktaduai khat chu pek i ni ngei dawn tih i ring bawk ang. 

Chutiang chiah chuan rinna chu Pathian hnena lawmthu lo sawi lawkna a ni. Pathianin a thutiam ang chuan a pe dawn che a ni tih lo rinlawkna chu a ni. Pathianin a thil tihsak che ringawt ni lovin amah ngei chu i hmangaih tihna a ni ang. Amahin a thutiama a tih tur a sawi ang ngei chu a ti ngei dawn a ni tih rinna chu a ni. 

Ni khat chu mitdel pahnih chuan an chenna in lamah Isua chu an zui a. An chunga zahngaihna lantir turin an au a ni, Isua chuan an damna tura rinna an neih leh neih loh a zawt let a. An ring tih thu an hrilh a, Isua chuan “In rinna chu in dampui ngei dawn e” tiin a lo chhang a ni [Matthaia 9: 29] 

Ka thil sawi chu hei hi a ni: Pathianin sangha man chu zir nawn fo tura a duh che a nih chuan sangha kan pawlh tur thil chu keng tel ang che.  A chhan chu chu mi zan chuan sangha kan [fry] tui tak i hmeh ngei dawn si a!

Ngaihtuah zui atan. 

Pathian hnenah chuan [chhanna i dawn hnuah] lawmthu i sawi nge rinnain [chhanna i dawn hmain] lawmthu i hrilh zawk? 

A hnena lawmthu i hrilh lawk [in advance] chuan engtiangin nge Pathian chuan a ṭhanlentir ang che? 

Thutak chu hei hi a ni, Pathian chuan i ṭawngṭaina zawng zawngah “aw” a ti vek lem lo. Engtin nge “aih” “Nakinah” “lo nghak rawh” a tih tawh hnu pawh chuan i ṭawngṭai chhunzawm zel theih ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...