Saturday, December 14, 2024

I CHANCHIN TAM ZAWK A LA AWM

_Hnuhma Chhinchhiahtlak Hnutchhiah_

- Rick Warren 
- Dec 14, 2024
_"Nimahsela mitthi zing ata Isua titho lehtua Thlarau chu nangmahnia a awm chuan, mitthi zing ata Krista Isua titho lehtu khan, nangmahnia awm Thlarau zarah chuan in taksa thi theite chu a tinung bawk ang."_ (Rom 8:11)

Ringtu kan nih angin beiseina kan nei a ni, a chhan chu vanramah Pathian nen chatuana kan la chen dawn avangin. Thihna hi tawpna a ni lo. Thil tam zawk a la awm. 

Engtik niah emaw i lungphu a la tawp ang a, chu chu i lei taksa chawlh ni a ni ang. Mahse i tawpna tur a la ni lo. Pathian anpuia siam i ni a. Chatuan daih tura siam i ni. He leia kan nunna chauh hi nunna awm a ni lo.

Beiseina neihna tur chhan a awm. A chhan chu, he leiah hian eng anga harsa leh hrehawm nimahse rei lote atan chauh a ni. Isua rinna i neih chuan natna, lungngaihna, leh dam lohna reng reng leh tawrhna reng reng awm tawh lohna hmunah kum maktaduai chuang i la awm dawn a ni tih i hre thei.

Rom 8:11-ah chuan heti hian kan hmu, _"Nimahsela mitthi zing ata Isua titho lehtua Thlarau chu nangmahnia a awm chuan, mitthi zing ata Krista Isua titho lehtu khan, nangmahnia awm Thlarau zarah chuan in taksa thi theite chu a tinung bawk ang."_

Pastor kan ni a, chhungkaw za chuang thlanmualah an chhungte vui liam turin ka lo dinpui tawh, chutah chuan beiseina nei leh nei lo inan lohzia ka hmu chiang hle. An mitah in hmu thei. Beiseina nei lo mite mitah chuan hlauhna rapthlak tak ka hmu ṭhin. "Ka neih zawng zawng ka chan ta. Hemi hi ka hmu tawh dawn lo. A zo ta.  Engkim a liam ta" an ti ni hian ka hmu ṭhin.

Ringtu invui liam ka hmuh sang tam takte nen hei hi ka khaikhin ṭhin. Anni chuan he thihna hi khawvel leh vanram inkal pawhna kailawn mai a ni tih an hria a. An hmangaih kal ta kha nunna tak awmna hmunah a lut a, chatuanin Pathian hnenah an cheng tawh dawn tih an hria. Kal tate ngaia lunglen hi chu a awm, mahse beiseina pawh a awm, a chhan chu engtikah emaw Isua zuitu an duhtak kal ta nen khan vanah an la intawk dawn tih an hre tlat a ni. Ringtu tan chuan thihna hi kan in chhuahsanna a ni lo - kan in taka hawna a ni zawk.

Chu beiseina, Isua Krista kiangah chatuanin i la cheng dawn a ni tih beiseina chu i nei em? I la neih loh chuan nghak khawtlai suh. He thutlukn pawimawh tak hi vawiin ngei hian siam rawh. Chu thutlukna siam dan chu a tawp lamah ka sawi ang.

Ngaihtuah zui atan.

Isua Kristaa chhandamna hian chatuan nunah thil danglamna a thlen. Mahse chu chuan engtinnge he leia i hun hman dan a nghawng?

Engtinnge chhandamna hian he khawvel thil atan a zalentir che?

Isua Krista kaltlanga beiseina i neih kha vawiin hian tu hnenah nge i hrilh ve theih ang?

*Engtinnge i chatuan hmun tur i chian ang?*

Isua i rin phawt chuan a hnenah chatuanin i cheng dawn tih i hre thei ang. Chumi kawnga ke pen tura i inpeih chuan heti hian ṭawngṭai rawh le:

"Isu, nang ka rin phawt che chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, ka Lal leh Chhandamtu i ni tih ka pawm e. Ka Lal atan ka thlang che a. Vawiin hian ka nunna zawng i tan ka hlan e. I hnung zuia ti tura min tih apiang tih ka duh e.

"Isu, min hmangaihna leh ka tana i inpekna avanga vanrama i hnen ka thlen ve theih avangin ka lawm e. Ka chhandamna thawh chhuah a ngaih loh avangin ka lawm e, chu chu thil theih a ni si lo a. Ka nunna zawng hi ka tan ni lovin i tana hman ka duh e. Ka nun i tan ka hlan a, i chhungkuaa mi pawm turin ka ngen a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...