Sunday, December 15, 2024

ROCHUN TUR LO HMUAK RENGTU CHE A AWM

_Hnuhma Chhinchhiahtlak Hnutchhiah_

- Rick Warren 
- Dec 15, 2025
_"Thlarau ngei chuan keimahni thlarau nen Pathian fate kan ni tih min hriattir ṭhin; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnena chawimawiin kan awm ve theihna turin amah kan tuarpui tak zet chuan."_ (Rom 8:16-17)

Mi hausa tawn taw fanu emaw fapa emaw i nih chuan rokhawm tur tam tak i nei tih chiang takin i hre nghal ang.

Mahse khawvela mi hausa tawn taw te ai pawha hausa zawk, lal Solomona ai pawha hausa zawk Pa i nei. I Pa vana miin a ro i luah theih nan a fate zingah a chhiar che a ni. Rom 8:16-17 ah chuan heti hian kan hmu, _"Thlarau ngei chuan keimahni thlarau nen Pathian fate kan ni tih min hriattir ṭhin; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnena chawimawiin kan awm ve theihna turin amah kan tuarpui tak zet chuan."_

Hei hi Bible bu pumpuia chang ngaihnawm berte zinga mi a ni. Pathianin a Fapa Isua Krista hnena a pek ang zawng zawng a pe che . A ropuina i la ṭawmpui dawn a ni. Chu chu tawp chin nei lo a la ni cheu! Vanramah chuan Pathianin a fa ni tura a siam che avangin Pathian thil neih tinreng ṭawm thei turin theihna pek i ni. Mahse a chhungkuaa tel turin Lal Isua Lal leh chhandamtu a i pawm a ngai.

Heti hian a sawi theih bawk, mi zawng zawng hi Pathian siam kan ni a, mahse mi zawng zawng hi Pathian fate kan ni lo. Amah thlanga hetianga i pawm hi a ngai, "Lalpa, nangmahah rinna ka nghat e. Krawsa ka tana i thawh kha ka pawm a. Ka ring che a, hmangaih che a rin che ka duh a ni" tiin.

Nu leh paten an faten an rothil hnutchhiah tam tak an enkawl zo dawn em tih fiah nan a tirah tlemte an pe lawk fo ṭhin.

Chu chu i thlarau nunah pawh a ni. He leia kan damchhung hun hi fiahna hun a ni. Chatuan atan i rintlak dawn em tih en nan che Pathianin i rinna fiah nan he khawvelah hian thil ho te a hmang ṭhin. Hausakna tlemte a pek che hmangin a fiah che a. Midangte nena inlaichinna a pek che hmangin a fiah bawk che a. Tin, hun remchang ṭha a pek che hmangin a fiah bawk ṭhin che.

Hengte hi ṭha taka i ti anih chuan engnge lo thlenga i rin? Bible chuan vanramah thil tam zawk chunga mawhphurhna pek i ni ang a ti: _"Tupawh tlemte chunga rinawm chu tam tak chungah pawh a rinawm ṭhin; tupawh tlemte chunga rinawm lo chu tam tak chungah pawh a rinawm lo ṭhin a ni."_ (Luka 16:10)

Pathianin a pek che kha engtinnge i enkawl?

Ngaihtuah zui atan.

Pathianin eng chungah nge fiah nan che mawhphurhna a pek che?

Engtiinnge vanrama mawhphurhna tam zawk i hlen theih nan tuna i mawhphurhna te ṭha zawka i hlen ang?

Engtinnge chatuan daih, roluah tur i nei tih i hriatnain sum leh i enkawl dan chungchangah thlir dan a neihtir che?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...