Sunday, December 29, 2024

ENGTINNGE PATHIANIN A NGAIH CHE TIH HRIAT DAN

_Beiseina Bulpui_

- Rick Warren 
- Dec 29, 2024
_"Pathianin a hmangaih che u a, a thlang che u a ni tih kan hre si a."_ (1 Thess. 1:4, GNT)

Beiseina nena i nun zawng zawng hman i duh chuan engpawhnise Pathianin i nihna a sawiah nghet taka i din a ngai. Miin an sawi danah che emaw mahni i inhmuh danah emaw i innghah chuan engmah a ni ngai lovang.

1 Thess. 1:4-ah chuan heti hian kan hmu, _"Pathianin a hmangaih che u a, a thlang che u a ni tih kan hre si a."_ (GNT)

Miten engtinnge an sawi che tih ka hriat a ngai lo, a chhan chu Pathianin engtinnge a sawi che tih kha a pawimawh ber. Bible chuan Pathianin a hmangaih che a, a thlang che a ni tih min hrilh.

Pathianin ngaihhlut leh pawmtlak i ni a ti che. Miten an pawm lo mai thei che a, hmangaihtlak i ni lo an ti a ni mai thei. Mahse Pathianin i nihna ang khan a pawm che a, a hmangaih che - khati maia i awm reng tur kha chuan a hmangaih lutuk che a ni.

Pathianin eng ang takin nge a hmangaih che tih i hre duh em? Kraws hi en mai rawh. Chutah chuan Isua a ban pharin, "Heti chen hian ka hmangaih che asin. I tel lova nun ai chuan ka thi zawk mai ang e. Ka hmangaih lutuk che a, ka na a ni. Thihpuitlak khawpa hlu i ni asin." a ti.

Isua chauh hi vanramah ser nei awm chhun a ni. Ser i nei miah lovang, mahse Isuaah krawsa a tawrhna ser kha a awm ang, chatuan atan a hmangaihna che lantirna a ni ang.

Rilru lam zir mite chuan i nuna mi pawimawh berten an ngaihdan che kha i inhlut dan hriltu an ni a ti.

Isua hi i nuna mi pawimawh bera dah turin ka ngen a che, a chhan chu midang zawngin an sawi dan che aia Isuan a sawi dan che a pawimawh vang a ni.

Miten an ngaihdan che i lungkham vak a ṭul tawh lo. Pathianin a thlir danah che beiseina i nei thei ang: ngaihhlut i ni, pawm i ni a, hmangaih i ni.

Ngaihtuah zui atan.

Engtinnge Pathianin a tiam che i hriat theih ang?

Pathianin a ngaihdan che a i nihna i nghah khan engtinnge inrintawkna a pek che?

I nunah Isua hi mi pawimawh ber a ni tih engtinnge i lantir ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...