Saturday, December 28, 2024

THLARAU CHAUIN INNGHAH NGHET A MAMAWH

_Beiseina Bulpui_

- Rick Warren 
- Dec 28, 2024
_"Ka nunna hi i chhandamna ngaiin a chau ta a: Nimahsela i thu ka beisei ṭhin." (Sam 119:81)

Kraws tluk zetin thirchakai hi kristiante chhinchhiahna upa tak tawh a ni. Kristianna len ṭan tirh lam kum 300 lai bawr vel khan ringtute chuan kraws ni lovin thirchakai hi a ruka an nihna chhinchhiahna an hmang ṭhin. Rom sorkar hnuaia tihduhna a hluar em em lai khan thirchakai kha beiseina nghet tak - ringtuten Isua Kristaa beiseina an neih chhinchhiah nana hman ṭhin a ni.

Kohhran hmasate phuar nghettu beiseina tho kha  vawiina kan nun phuar nghet theitu chu a ni.

Bible-in kan nuna harsatna te hi a chang chuan thlipui, tuifawn leh thli na tak nena kan nun rawn deng dawt dawt angin a tarlang ṭhin. Chutiang hun khirhah chuan Pathian thu, Bible hi kan nun thlung nghettu thirchakai a ni ṭhin.

Tute pawh hian kan nun sawi nghingtu thlipui kan hmachhawn mek, tisa lamah emaw, rilru lamah emaw, sum leh paiah emaw, inlaichinna kawngah emaw pawh a ni thei.

Harsatnain a nuai vel lai chein engtinnge beiseina i neih reng theih ang?

Davida tih dan ang khan ti rawh. I chak lohna ni lovin Pathian thu lam en zawk rawh.

Davida chuan heti hian a ti, _"Ka nunna hi i chhandamna ngaiin a chau ta a: Nimahsela i thu ka beisei ṭhin."_ (Sam 119:81)

Pathian hnenah i nun tlak danglam turin rei tak, hun eng emaw chen i lo dil char char tawh a ni mai thei. Chak lo, lungngai, keh darh, leh chhe der anga inngaiin a siam mai thei che.

Mahse Davida chuan heti hian a sawi chhunzawm, _"Nimahse i thu ka beisei ṭhin."_ (Sam 119:81)

Midangte emaw midangte puitu pawlho emaw , media-te emaw aia Bible hi i nuna thuneitu leh i beiseina innghah nana i hman chuan danglam ngai lo, innghahna nghetah i nun i thlung nghet tihna a ni. I nun leng vak tur i veng tihna a ni. Innghahna tlak i neih avangin i leng vak mai mai ṭhin kha i chawlhsan thei ang.

_"Chutichuan dik lohna ngamthlemna angin, fing verveka mihring bum chawpin, zirtirna thli tinrenga lehlam lehlama vawrh leh len len naupang kan ni tawh lo vang a"_ (Ephesi 4:14)

Khawtlang ngaihhlutzawng danglam ṭhin avang leh mite ngaihdan avang maiin intichau suh. Danglam ve ngai lo awm chhun, innghahnatlak Pathian thu i nei alawm.

Ngaihtuah zui atan.

Harsatna i paltlang laiin engvangin nge thudik i hriat a ṭul?

Harsatna thlipui kara Pathian chhanna i nghah lai khan Pathianin engnge ti tura a duh che ni a i rin?

Pathian thu hunbi neia i chhiarin beiseina i neih phah em? Engvangin?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...