Friday, November 8, 2024

I HUAISENNA CHUAN MIDANG A FUIH THEI

_Sawinghin Rual Loh_ 

By Rick Warren
— Nov 08, 2024
“Thu ka pe e, ka ram chhûnga mi zawng zawngin Daniela Pathian hi an ṭihin an zah tûr a ni.
Pathian nung a ni a,
Chatuanin ro a rêl ang.
A ram chu a chhe ngai lo vang a,
A lalna chu a tâwp ngai lo vang.” [Daniela 6:26]

A chang chuan miten min nuihzat ngei dawn a ni tih kan hriat reng laia Pathian hminga dinchhuah chu a harsat viau chang a awm. 

Mi dang zawng an ṭhut tlat laia ding bik i nih chuan ringlo mite chu Pathian lamah i hawitir hlauh thei tlat. 

A chhan chu huaisenna chuan midang a kai chhawng thei. Rinnaa i ding ngheh ngat a nih chuan mi engzatin nge lo zui ang che tih chu i chhut chhuak thiam mai lo hial ang. 

Mi tam berte chuan rinna nun chhuahpui ṭhintu tu emaw an lo thlir reng zawk a ni. Tu emawin an rinna an pen chhuahpui lai chu an lo thlir a ni. Mi pakhat rinna leh huaisenna chuan midang pawh a kangkai thei ang. 

Chu chu Daniala nunah khan a dik. Daniala kha Pathian hmingin huaisen takin a ding a, vantlang hmaa Pathian dik tak [Lal Darius-a zawk chibai buk lova] chibai a buk khan sakeibainei pukah paih a ni a. Mahse fianrial zirlai eng emaw bera kan lo sawi tawh ang khan Pathian chuan a chhanhim thung. 

Chu chu Lal Darias-a pawh khan a lo hmu vat a nih kha. 

Bible chuan Pathian ring lotu lal chungchang kha hetiang hian a sawi: “Lal Daria chuan khawvêla hnam tin, chi tin, ṭawng tin hmangte hnênah lehkha a ziak a; “Remna in hnênah awm rawh se. Thu ka pe e, ka ram chhûnga mi zawng zawngin Daniela Pathian hi an ṭihin an zah tûr a ni.
Pathian nung a ni a,
Chatuanin ro a rêl ang.
A ram chu a chhe ngai lo vang a,
A lalna chu a tâwp ngai lo vang.
A chhandam a, a chhan chhuak ta,
Leiah leh vânah chhinchhiahna te,
Thil mak tak takte a ti a,
Sakeibaknei lakah Daniela pawh a chhan chhuak,” tiin.
Daria lal lai leh Persia lal Kura lal laite chuan Daniela chu kawng engkimah a hmuingîl hle a,” tiin [Daniel 6:25-28].

Pathian ringlotu lal chuan chutiang dan chu a zam ngai lo ang. Darius-a kha Pathian dik tak zuitu a lo ni ve ta tihna a nih kha. Danial-a chu huaisen taka ding chhuakin Pathian ṭanin a ding chhuak a nih kha. Daniala huaisenna khan Darius-a chu Pathian zuituah a siam ta a ni. 
I huaisenna chuan a tisawt ang che, Daniala chunga hna a thawh ang chiah khan. Mahse nangma hlawkna tur ringawt erawh a ni lo vang. 

Pathian tan i ding chhuak a nih chuan, khawi hmunah pawh awm la, midangte chuan an hmu ve vat ang. Pathian chuan i huaisenna chu midang ṭanpuina atan leh fiahna an hmachhawn mek huaisen taka hneh turin a fuih thei ang. 

Huaisenna – dik leh tak, Pathian chawimawina chuan – mite Pathian lam a hawitir a ni. 

Ngaihtuah zui atan. 

Huaisenna chuan eng vangin nge midang a fuih? 

Midang huaisenna leh rinna chuan engtin nge a lo fuih chak ve tawh che? 

Tun karah hian eng ang rinna rahbi nge i rah ang a, chu chuan engtin nge midang a tihhuaisenin a tihphur ve theih ang? 

Isua chu i innghahna nghing ngai lo a ni. 

Isua chu i chhandamna a ni a, i kulhbing nghing ve ngai lo tur chu a ni. 

Hetiang hian a sawi, “Chutichuan, mi tin hêng ka thu hi hriaa zâwm apiang chu, mi fing lungpui chunga in satu nên tehkhin tur a ni. Ruahte a lo sûr a, tuite a lo lian a, thlite a lo tleh a, chu mi in chu a rawn nam sawk sawk a; nimahsela a chim lo va; lungpui chunga rem tlat a nih avângin,” tiin [Matthew 7:24-25].

Isua hmangaihna chu tiamchin nei lo a ni a. I kianga awm reng chatuan atan a tiam a. Amah chu inngahna nghing ngai lo nangmah tinghettu tur che chu a ni. A rahbi hmasa ber tur chu a chhandamna thutiam pawm phawt chu a ni thung. 

Pathian chu a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: 

“Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...