Thursday, November 7, 2024

PATHIAN TANA DING CHHUAK LEH HLAUHNA HNEHNA

_Sawinghin_ _Rual_ _Loh_ 

By Rick Warren
- November 07, 2024
“Lalpa, ngai teh, tûna an mi vau dân hi, i thu hril ngam tûrin i bawihte hi huaisenna pe ang che.” [Tirhkohte 4:29]

Hlauh zawng kan nei vek. Mahse, chung hlauhnate chu kan nun kan thununtir zing mah mah fova, chu chuan Pathian thil ruahman a tisukuk fo. Mihring emaw buaina emaw chuan i nun emaw Isua tana thuhretu i nihna emaw tibuai che a ni tih i hmuh chang chuan, duhthlanna chu i kuta awm a ni: i hlauhnaah chuan i tlawm ang nge, hlau chung chung pawhin Pathian tan chuan i ding nghet tlat zawk ang?   

Hlauhna chu a ṭhang lian zel a. Chu hlauhnaa i inhnimphum apiang chuan i buai zual zel ang. Hlauhna chu a zual zel a nih chuan i nun pawh a chimpil hial thei ang. 

Ringtu hmasate kha chu chu a entirna ṭha tak an ni thei ang. Tihduhdahna chi tinreng an tuar a, Tirhkohte thiltih buah khan engtiang chiahin nge Pathian chuan ringtute nun kaltlang chuan hna a thawh a, an hlauhnate chu a hnehsak tih kan hmu thei. 

Tirhkohte 4 chuan Petera leh Johana ten huaisen taka anmahni dodaltute an hmachhawn dan chanchin min kawhhmuh a. Hetiang hian an ṭawngṭai a nih kha: “Lalpa, ngai teh, tûna an mi vau dân hi, i thu hril ngam tûrin i bawihte hi huaisenna pe ang che.” [Tirhkohte 4:29]

I hlauhna avanga hlauhna laka tlawmna chu a chinfelna a ni lo. Hlau chung chung pawha hmalam pan zel nun zawk chu a ni. I hlau a nih chuan hlauhna chu din chhuahpui ang che. Hlauhna chuan fim takin a ngaihtuah thei lova, hlauhna pumpelh theih dan kawng ṭha ber chu Pathian ring chunga hmachhawn chu a ni. 

Hei hi vawi khat mah theihnghilh suh: Jordan lui chu i dai chiah hma chuan a tikang chat ngai miah lovang [II Lalte 2:8a Pathianin Elijah leh Elisha tana a hnathawh kha ngaihtuah ang che]. Rinnahin dai ang che, tichuan Pathian chuan i kawng a kawhhmuh zel ang. Mahse i hlauhna hmuna i awm reng chhung chuan engmah a thleng kher lo vang. 

Vawiin hian rinnain ke pen la, Pathianin i hlauhna a hnehsak dan che chu thlir ang che. 

Ngaihtuah zui atan

- Hlauh neia i awm avanga i hlauhna ṭhang lian zel lai chu i lo hmu tawh ṭhin em? Huaisen taka i pen chhuah avanga i hlauhna bo tak duak lai chu i lo hmu ve tawh em? 

- Eng ang hlauhna nge hneh tuma i beih mek? Eng vangin nge? 

- Eng ang hlauhna nge tunah khan hneh harsa i tih em em? Eng vangin nge? 

- Pathian kuta hlauhna hlan tih awmzia chu eng nge ni ta ang? 

Hlauhna chuan a tantir chein i hria em? 
Bible chuan hetiang hian a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...