- Rick Warren
- Oct 05, 2024
_"Pathianin engnge ti tura a duh che tih hriat i duh chuan amah zawt mai rawh, lawm takin a hrilh ang che . . . Rinnaa i zawh loh chuan chhanna mumal tak Pathian hnen aṭangin beisei suh."_ (Jakoba 1:5-8, TLB)
Pathianin i nunkawng hruai a duh, mahse thil pahnih i tih a ngai: a hnenah ṭanpuina i dil a ngai a, rilru dik tak nena i dil a ngai. Rinnaa i dil a ngai, a chhanna rinna nena beisei chungin.
The Living Bible chuan Jakoba 1:5-8 hi heti hian a ziak, _"Pathianin engnge ti tura a duh che tih hriat i duh chuan amah zawt mai rawh, lawm takin a hrilh ang che . . . Rinnaa i zawh loh chuan chhanna mumal tak Pathian hnen aṭangin beisei suh."_
Pathian hnenah a chhanna beisei miah si lovin thil i dil tawh em? I rinna ang zelin Pathianin i nunah hna a thawk ṭhin. Rinnaa nung kan tih chuan i ṭawngṭainate Pathianin a chhan i beisei kha a ni.
Thil ching fela a thutiam a hlen i beisei a. Nangmah kaltlangin a duhzawng a tihpuitlin i beisei a. A duhzawng tihpuitlin nana i mamawh apiang a pek che i beiseina kha a ni.
"Lalpa, min hruai rawh" kan ti fo ṭhin, mahse a hruaina ngaichang lovin kan kal leh mai ṭhin. Kan harsatna chinfel tumin kan kal vut a. Pathianin finna min pein thutlukna dik siam tura min pui turin kan duh kan ti a, mahse a tih tak tak kan beisei leh si lo. Keimahniah a innghat vekin kan ring leh si.
Mahse i nghah phawt chuan Pathianin finna pek che a tiam. Pathian mita hringnun kan thlir thiamna hi finna chu a ni. Pathianin duhzawnga thutlukna siamthiamna hi finna chu a ni.
Hei hi han ngaihtuah teh: Pathianin thutlukna dik lo a siam ngai lo a. Thil a tisual ngai lo. Amah i rina a thu i ngaihthlak chuan a hruai ang che. Mahse rinna nena i dil hmasak a ngai.
I ngaihtuahna chu engpawhniin eng ang pawhin nung mahla Pathian chu i tan a awm reng a, a do ngai lo che. Pathian ṭha tak a ni a, i ṭhatna turin a thawk ṭhin a ni tih hi a rintlak a ni. I hmalam hun atan amahah rinna i nghat thei ang, nang aiin i tan ṭha ber tur a hriat avangin.
He thudik hi i ṭawngṭaina innghahna a nih hunin i ṭawngṭainain thil a ti thei anga, awmzia a nei bawk ang.
I nunah Pathianin engnge ti sela i duh? I tan a ṭha tur a ti zel dawn tih ring chungin i nunah engnge ti se i duh? Pathian ṭhatna i nun innghah nana ring reng chungin i nunah engnge thlen se i duh?
Rinna nen dil rawh!
Ngaihtuah zui atan.
Pathian hnenah a pek che beisei lo chungin i dil tawh em? Engnge i dil? Engtinnge a chhan?
Pathianin i ṭawngṭai a chhanna i nghah laiin engnge i tih ṭhin?
Vawiin hian Pathianin i ṭawngṭaina a chhan beisei chungin engnge i dil theih le?
*Vawiin hian Isua i zui dawn em?*
Bible chuan Pathian Fapa Isua Krista i rin chauhin vanram i thleng thei a ti. Vanram hi thawh chhuan chi a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)
Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.
"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a, ka Lal atan ka thlang e. Ka thinlung hi i hmangaihna leh beiseinain min thlaksak rawh. Min hruai la, i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment