_Ni 40 Chhung Ṭawngṭaina_
By Rick Warren
— October 04, 2024
“Retheite chu dik takin ro a rêlsak a,
Mi tlâwmte chu a kawng a zirtîr ṭhîn.” [Sam 25:9]
Pathian chuan i hringnunah kawng kawhhmuh tur chein a inpeih reng a, mahse hruaitu i mamawh a ni tih i pawm hmsak ve phawt a ngai.
Mi tam ber ang deuh i nih ngat chuan Pathian emaw midang hrim hrim emaw chu i zui duh tak tak lovang. Nangmaha awm mai i duh zawk ang. Pathianin ti tura a duh che chu ti mai lovin, nangmaha tih i tum a ni.
Isaia 53: 6 chuan hetiang hian a sawi, “Berâm angin kan vâk bo vek tawh a, Mahni duh lam lam kan pan ṭheuh va; LALPAN kan zaa khawlohna chu A chungah chuan a nghat ta a ni,” tiin. Beram, zia pakhat langsar tak chu kal bo a ni. Chuvang chuan berampu hruaina chu an mamawh ṭhin. Beram nihna langsar tak dang chu an khaw hmuh a fiah lo a. Thui tak an thlir thiam lo.
Bible-in beramte nena min lo khaikhin pawh hi a mak lo ve! Pathian min siam danah hi chuan hmalam hun [future] hi tum ngial pawh ni ila kan hmu thei lo. Chutianga min siam chhan chu amah rinchhan tura min duh vang a ni.
Pathian, min vengtu, kawng dika min hruaitu chu kan mamawh a ni.
Thufingte 14: 12 chuan, “Mi ngaiha kawng dik ni âwm taka lang, A tâwp chu thihna kawng ni si a awm,” tiin a sawi. Thutlukna kan siam hlima dik mai awma lang, a hnu zela dik leh ta si lo a awm ṭhin. Chutiang kawng chu a tawp hmak a, ṭhenkhatte erawh a kawng bo thung. Chuvang tak chuan a ni, “Lalpa ka mamawh che” i tih a ngaih ṭhin.
Nangma duh dan aia Pathian duh dan i rin zawk chang chuan Pathian chu i ring takzet tih i tarlang a, chu chuan khawvelah hian thil tam tak a tidanglam thei ang.
I dinhmun chu nangma thlirna mai aṭanga i thlir a nih chuan thil a danglam viau lo vang. Mahse Pathian thlirna chu i thlirna leh i suangtuahna zawng zawng ai chuan a ropuiin a zauin a thuk zawk a ni tih i rin chiah chuan i harsatnate chu an te rawih rawih mai ang. A rahbi dawttu chu a chiang sawt tawh ang.
Israel sipaiten Goliatha an en khan, “He pa zet hi chu kan khin phak a ni lo. Engtikah mah kan hneh ngai lovang,” an ti hial awm e. An thlirna kha an pawm a nih chuan an tlawm ang.
Mahse Davida thung chuan Goliatha chu enin thlirna danglam daih a nei ta thung a, “Mihring thi thei mai, Pathian chova diriamtu a ni e,” tiin a sawi a nih kha. Pathian chuan anmahni ai chuan a hmu thui zawkin thil pawh a tithei zawk daih angin a ngai a, chu chuan Israel fate hnehna a chantir a nih kha.
Nunna kawnga kal tur chuan Pathian chu i rin chhan thei ang. Kawng dika hruai ngei che chu a duh a, a hnena in inpumpek a a hruaina hnuaia i intulut a nih chuan chu kawng ngeiah chuan a hruai ang che.
Ngaihtuah zui atan
I duhthlanna siam a tira ṭha anga lang, a hnua ṭha hauh si lo chu engnge ni? Pathian finna aiin nangma finna chu engtiangin nge i rin zawk ṭhin?
I nuna a khawi lai kha nge Pathian kuta hlan chu harsa i tih ṭhin?
Pathian hruaina chang turin Pathian hmaah chuan engnge i pawm ngai?
[ *Lettu:* Peka]
No comments:
Post a Comment