Thursday, October 3, 2024

HMATHLIR ROPUI NEI TURIN TIHTAK ZETA ṬAWNGṬAINA

_Ni 40 Chhung Ṭawngṭaina_

By Rick Warren
— October 03, 2024
“Chutichuan, keimahnia thawk ṭhîn thiltihtheihna hmanga, kan dîl leh kan ngaihtuah phâk aia nasa zâwka ti theitu hnênah ngei chuan.” [Ephesi 3:20]

Pathian chuan i thlen theih tawka sang ber thleng la, i hmathlir leh thiltumte pawh chu a thiltihtheihna leh a hmangaihnaah chuan innghat tlat sela tih a duh a. Hmathlir ropui tak neiin rinna kawngah ṭhanglian zel la tih a duh a ni.   

Pathian chuan ṭawngṭaina nun dik tak nei turin a duh bawk che. 

Jabez-a ṭawngṭai nun kha a hmathlir [dream] a tihhlawhtlin theih chhan thuruk a ni. Hetiang hian a ṭawngṭai, “Aw, mal mi sâwm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nân sual lak ata mi thiarfihlîm ang che,” tiin [1 Chronicles 4:10]. Tichuan chu chang chu “Pathian chuan a chhang a” tih thuin a chhunzawm a nih kha. 

Pathian chu thil engmah i dil khalhin emaw i suangtuah khalh thei lo ti i hria em? Bible chuan, “Chutichuan, keimahnia thawk ṭhîn thiltihtheihna hmanga, kan dîl leh kan ngaihtuah phâk aia nasa zâwka ti theitu hnênah ngei chuan,” tiin a sawi [Ephesi 3: 20]. Kal chhuak la i chunga thil ropui ber lo thleng thei chu han ngaihtuah teh le – chu aia ropui zawk chu Pathian chuan a thawk thei tih hria ang che. 

Chu Pathian nihna chu Jabez-a khan hriain thil pathum a dil ta a ni: 

Jabez-a chuan a nun atana Pathian malsawmna chu a dil. A ṭawngṭainaah chuan, “Aw, mal min sawm ngei la” a ti a. “Pathian hnenah chuan malsawmna i dil tur a ni lo, mahni hma a sial thlak lutuk,” i ti mai thei. Mahse Pathian thlirna lam aṭang chuan a malsawmna dil chu thil ṭha tak a ni thung. I nun kha mal a sawm duh, amah nen rinawm takin inleng dun ṭhin a nih ngat chuan. 

Jabez-a chuan a nuna Pathian thiltihtheihna a dil. “I kut chu ka kiangah awm rawh se” tiin a ṭawngṭai a. Pathian thiltihtheihna chu a dil a ni. Jabez-a khan ram zau zawk a nei a nih chuan mawhphurhna sang zawk leh khirh zawk a nei dawn tih a hria a. Chutiang ram chu enkawl tur chuan Pathian ṭanpuina a mamawh tih a hria.  

Jabez-a chuan Pathianin a nun a humhim chu a dil. “Natna ka pumpelh theih nan natna lakah chuan min veng ang che,” tiin a ṭawngṭai a ni. Jabez-a khan eng vangin nge Pathian humhimna a dil? A chhan chu mi tupawh a hlawhtlin ang zelin amah sawiseltu an tam zel tih a hriat chian vang a ni. Chu chu Kristian nunah pawh a dik tlat: Lalpa i hnaih deuh deuh ang zelin, i Kristian nunah chuan i lo chak zel ang a, sual pawhin nasa zawkin a bei ve zel ang che. Pathian venhimna i mamawh dawn a ni. 

I nuna i thil mamawh apiang chu Pathian hnenah chuan dil ang che. 

Mahse, chung thil i mamawh chhan leh i duh chhan te chu Pathian duh dan nen an inrem em tih thlir hmasa ang che. Chumi hnu chuan Jabez-a ṭawngṭaina ang khan i dil ve thei ang: Pathian malsawmna, thiltihtheihna leh venhimna te chu. Tichuan, Pathianin i ṭawngṭaina a chhan dan chu lo thlir ang che!

Ngaihtuah zui atan

Pathian malsawmna dil thei lo tur chuan engin nge dal che? Chu chuan Pathian i rin dan leh nangmah i inhmuh dan chu engtin nge a tarlan? 

I nunah chuan Pathian thiltihtheihna chu eng vangin nge i mamawh?

Pathian i hnaih deuh deuh angin zelin Setana chu a tlan chhe zel a ni tih engtin nge i lo hriat ve tawh? Chutiang hunah chuan Pathian hnenah engnge i sawi ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...