_Ni 40 Chhung Ṭawngṭaina_
- Rick Warren
- Oct 06, 2024
_"Pathianin thu a sawi ṭhin - a changin kawng khatin, a changin kawng dangin- miten an hrethiam lo anih pawhin ."_ (Joba 33:14, NCV)
Pathianin a aw hre thei turin a siam che. Nangmahah khan Pathian kaihhruaia awm theihna turin "thu dawngtu" i nei.
Pathianin eng hmanrua/kalka nge a hman? Pathianin thu sawi nana a hman ber pakhat chu Bible hi a ni. Hei vang hian a ni nitin Bible chhiar hi a pawimawh em em. A thuah hian Pathian duhzawng a awm. Heta ṭang hian a ni i ngaihdan te kha Pathian aṭanga i dawn a nih leh nih loh a hriat ni.
Zirtirtu Pathian mi takte kaltlangin Pathianin thu a sawi bawk ṭhin. Biak inah emaw Bible in zirnaah emaw, in zirtirtuin nangmah ngei kha bia chein i inhre ṭhin em? Chumi hunah tak chuan Pathianin a bia che a ni.
Tunah khan tuin emaw zirtir thiamna thilpek a dawn chuan Bible nen a inmil thlap dawn. Chumi chu mi hneh thei tak a ni emaw, a thusawi aṭangin eng anga nasain nge i rilru a hneh ka ngaihtuah lo. A thusawite kha Bible thu nen a inmil loh chuan zirtirtu chuan zirtir theihna thilpek a dawng lo tihna a ni.
1 Kor 2:13-ah hemi chungchang hi kan hmu, _"Mihring finna zirtir thua sawi lovin, Thlarau zirtir thua sawi zawkin, Thlarau lam thute chu thlarau lam mite hnena hrilhfiahin, chung thil min pek thute pawh chu kan sawi ṭhin."_
Pathianin ringtu dangte kaltlangin thu a sawi ṭhin. Nangmah kaltlang pawhin thu a sawi! Pathian lama i beng i chhit a a thu i zir chuan, Pathianin nangmah kaltlangin midangte hnena hriattir a duh chu hriattir nan a hmang ang che. Pastor-te tan chauh a ni lo, ringtute nunah Pathianin a hun a zirin thu a sawi ṭhin.
I harsatna tawn leh i natna te kaltlangin Pathianin i hnenah thu a sawi ṭhin bawk. Chu chu Pathian duhzawng kan zir dan kawng kan duh ber erawh a ni lo, mahse Pathianin i hnena thu a sawina ropui berte zinga mi a ni ang. Pathianin i natna te a thlawnin a kaltir mai ngai lo.
Joba 33:14-ah chuan heti hian kan hmu, _"Pathianin thu a sawi ṭhin - a changin kawng khatin, a changin kawng dangin- miten an hrethiam lo anih pawhin ."_ (Joba 33:14, NCV)
Pathian chu engtik lai pawhin a ṭawng reng. Mahse i ngaihthlak a ngai. He khawvel bengchheng tak karah hian a chang chuan thil tih aii sawi liam mai hi a awl zawk ṭhin. Chuvang chuan Thlarau Thianghlim hruaina hnuaia kal hi a pawimawh tak zet. I ngaithla a, a thu i zawm phawt chuan kawng dikah a hruai zel ang che.
Ngaihtuah zui ata.
Pathianin eng "hmanrua" kaltllangin nge a biak tam che? Engnge a sawi hnuhnung ber?
Pathianin engtin nge natna i tawnte kha amah i hriat chian leh zual nan leh a hmangaihna i hriat fiah nan a hman?
Mi tuin emaw Bible a zirtir lai che khan Thlarau Thianghimin eng hna nge a thawh?
[Lettu: Mapuia Fanai]
No comments:
Post a Comment