Monday, October 7, 2024

LALPAN KAWNG A SIAL ANG

_Ni 40 Chhung Ṭawngṭaina_

Rick Warren
7 Oct, 2024
“I thinlung zawng zawngin Lalpa ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zêl ang che.”
‭‭THUFINGTE‬ ‭3‬:‭5‬-‭6‬ ‭

Tunah hian sum lamah emaw, thinlungah emaw inlaichinna kawngah pawh a ni thei e, i kawng zawh lai a tawp mai ta emaw tih turin i awm mai thei. Mahse i rah zel tur kawng chu hmu thei lo mah la Pathian i rin zel a, hmalam i pan zel a ngai si a. Pathianin kawng a sial sak zel ang che.

I tana remruat kawng i zawh khan Pathian ruahmannate chu hriatthiam a awm chho zel a. Mahse chu kawng zawh turin hriatthiam kher erawh i mamawh lo.

Thufingte 4:18ah chuan, “Mi felte kawng erawh chu zîng khawvâr êng tir, chhûn vânglai thlenga êng zual zel ang hi a ni” a ti a.

Tunah chuan i hma lam en zel turin i kawng ên tu pawh a ṭha tawk lo ni pawhin a lang ang. Mahse i hmalam kawng atan Lalpa i rin chuan, a tlachawp zelin kawng a sial sak zel ang che. Tichuan nakinah chuan chatuana tan êng famkim awm naah i thleng anga, a aia fiah zawkin ila hmu thei ang. I tana Pathian remruat chu i hrefiah tawh ang.

Chumi hma zawng, Thufingte 3:5-6 in a sawi hi lo zawm la, “I thinlung zawng zawngin Lalpa ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zêl ang che.”
‭‭
Chumi chu sawi mai ang hian a awlsam kher lo. Kan dinhmun kan hriatchian danah leh keimahniah rinna inzawn ṭhin kan ni a. Tumahah intukluh kan duh ngai lo. Mahni a kan kawng ṭheuh zawh duh kan ni a. Mahni hun bi ang zela awm duh vek kan ni.

Dawhthei rawh. Pathian chuan engnge a tih a hria. I tana ṭha ber pawh a hria. A ṭhat em avang pawhin amah chu i ring thei ang.

A tawpna chu i hmu pha kher lovang, mahse Lalpa chuan a hmu vek a. Heng harsatna zawng zawng te, thinlung natte, thil hahthlak tak takte, nghah ngaia tih khawtlai zawng zawngte avanga 'engvang nge hei hi' ti a i zawhna zawng zawng kha, Pathian engah chuan engkim ala fiah ang.

Tunah erawh chuan, Pathian rin mai kha i zir a ngai a. Kal la, i ke pen la. Pathian finna leh a thutiama innghah zir la. I tana a ruahman kawng zawh tlatin, ani chuan i kawng a sial sak zel ang che.

Ngaihtuah zui atan...

I nunhlui ah kawng awma a lan tawh loh hnuah engtin nge Pathianin kawng a sial sak dan che?

I thinlung zawng zawnga Lalpa i rin chuan i nunah eng danglamna nge awm ang?

Vawiin hian a tawpna hmu thei lo mahla eng kawng nge i zawh dawn le?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...