_Tihnghin Rual Loh_
- Rick Warren
- Oct 27, 2024
_"Tuite in dai kai lai pawhin kei in hnênah ka awm ang a; luite in dai kai lai pawhin a chim pil lo vang che u: meia in kal tlâng lai pawhin in kang lo vang a; meialhin a tialh hek lo vang che u."_ (Isaia 43:2)
Boruak a rih viau a harsatna nasa tak kan tawk dawn tawh ni a a lan laiin he thu hi miten an sawi ṭhin, "A kaw tawp kan thleng ta."
Tuma'n hemi boruaka chên hi kan duh lo.
Zawlnei Daniela ṭhian pathumte kha he dinhmunah chiah hian an lo ding tawh.
Daniela bung 3 kan chhiar chuan, a ṭhiante khan lal Nebukadnezzara lim chibai an buk duh loh khan lal kha a thinrim em em a, rawhtuina meipui kha a let sariha tisa a, anni chu meipuia thlak tur thu a pe anih kha.
Kha meipui kha a sa hle a, a kaw tawpah an ṭang tawh tak meuh a ni.
Mahse Pathianin kha meipui karah khan a kalpui tlat: _"Tichuan, lal Nebukadnezzara chuan mak a ti a, hmanhmawh takin a tho va, a remruatpuitute hnênah chuan, 'Mi pathum te kha phuarin meiah kan thehlût a ni lâwm ni kha?' tiin a sawi a. Lal chu an chhang a, a hnênah, 'Aw lalber theh lût e,' an ti a. Ani chuan, 'Ngai teh u, mi pali phelha mei laia vei vei a, na hauh lovin ka hmu a, a palina landan phei chu pathiante fapa ang a ni,' a ti a."_ (Daniela 3:24-25)
Ni e, nang leh kei hian an zinga mi kha "lalte fapa" an sawi ang kha a ni lo tih chiang takin kan hria. Isua, Pathian Fapa mal neih chhun a ni tih kan hria. An zingah awmin meipui kha a kal tlangpui a ni. Chutiang chiah chuan nang pawh meipui a kal tlangpui ang che.
Isuan heti hian kan hnenah a sawi, _"Ngai teh u, kei kumkhuain, khawvel tawp thleng pawhin in hnenah ka awm zel ang." _ (Matthaia 28:20)
Bible chuan malin i awm ngai lovang min ti. I kiangah Pathian a awm reng a, i tan a awm zel ang.
_"Tuite in dai kai lai pawhin kei in hnênah ka awm ang a; luite in dai kai lai pawhin a chim pil lo vang che u: meia in kal tlâng lai pawhin in kang lo vang a; meialhin a tialh hek lo vang che u."_ (Isaia 43:2)
Bible hian tuite in dai kai chuan a ti lo; tuite in dai kai hunin a ti zawk.
Buaina i tawk ngei ang. Mahse chung karah pawh chuan i kiangah Isua a kal ve zel ang. Amah i rina i hmuh fiah theih nan nangmaha awm Pathian thlarau chuan chakna leh huaisenna a pe ang che.
Harsatna vawrtawp i thleng a ni thei, mahse malin i awm lovang.
Ngaihtuah zui atan..
Thlarau Thianghlim hian muanna a pe che em? Engvangin?
I nunkawng a khirha harsatna i tawh laiin tuin nge i nuna Pathian hnathawh kawhhmuh thei ang che?
Tunah hian tuin he thuchah hi mamawh le? Engtinnge tunkar chhung hian an hnenah i sawi ang?
[Lettu: Mapuia Fanai]
No comments:
Post a Comment