_Tihnghin Rual Loh_
- Rick Warren
- Oct 13, 2024
_"I thinlung zawng zawngin LALPA ring la, Nangma hriatnaah innghat suh."_ (Thufingte 3:5)
Mi tam tak chuan Pathian thu an zawm hma hauhin hlawhtlinna an dil - mahse chu chu rinna a ni lo. Rinna chuan a chhe ber huama tih tawp a keng tel.
I hriatthiam hauh loh lai pawha a thu i zawmna kha rinna chu a ni. Entir nan, mi i ngaihdam hma chuan ngaihdamna hi thil ṭha tak niin a lang lo, mahse i rinna fiahna ṭha berte zinga pakhat a ni. Tuin emaw a tihnat chein ngaihdam kha i chak lo emaw a ṭha tawk i ti lo emaw a ni mai thei. Mahse ngaihdamna hi i hrethiam emaw hrethiam lo emaw, duhthlanna ṭha ber a ni.
I naupan laiin, i tana awmzia awm si lo i nu leh paten an tihtir che kha i la hria em? Mahse tunah kha han thlir let la, i nu leh pate thlir dan kha i hrethiam ve tawh ang.
Chutiang chu Pathian hnathawh dan a ni.
Thufingte 3:5-ah chuan heti hian kan hmu, _"I thinlung zawng zawngin LALPA ring la, Nangma hriatnaah innghat suh."_ Rinna chu thil, awm ang lo viau anga lang mahse dik ni si kan tih hi a ni. A pumpuiin i hmu fiah ngai lo, mahse Pathian chuan a hrethiam vek si.
Hemi chungchangah chuan Bible-in Roreltute bung 7-naah Gideona nun aṭangin entirna ṭha tak min pe. Gideona khan hmelma sipai 135,000 bei turin Israel sipai 300 chauh a hruai. Israel sipai pakhatin hmelma sipai 450 zel a bitum a ngai tihna a ni. Pathianin sipaite chu meichher, tawtawrawt leh hlumbel keng turin a ti - he thupek hi Gideona khan awm ang lo a tih viau a rinawm.
Tichuan Pathianin Gideona hnenah an hlum belte chu zan thim hnuaia a êng a lan theih loh nan an meichher chunga dah a hmelmate riahhmun hual turin a ti a. Hetiang hi Pathian thupek dan chu a ni: "Tawtawrawt ham tura ka tih ve leh che u hlum bel chu tikeh ula, thim zingah in meichher chu lo êng thut sela. Riahbuk velah te chuan sipai tam tak angin in lang dawn a ni. Chu chuan hmelma sipaite a tichiai anga, an inhretawn lovang a, anmahni leh anmahni an inbei tawh mai ang."
Awmzia awm lo angin lang mahse Gideona khan Pathian thu a awih tlat. Israel sipaite chuan an tawtawrawt an ham a, an hlum bel an tikeh a, an meichher chu a êng ta ṭhuau a. Hmelma sipaite chu hlau em emin an rawn harh a, Israel sipaite bei lovin anmahni leh anmahni an inbei ta vak mai a. A chhan chu, Pathian hnathawh dan tur hrethiam lo mahse Gideona khan Pathian thu a awih tlat a - indonaah hnehna an chang ta a ni.
A chang chuan thil âtthlak tak anga lang ti turin Pathianin a hrilh ṭhin ang che- thilmak tak tak tawng tura indonaa lut tura kal ang chi te hi. Mahse rinna i neih phawt chuan hrethiam lo maa Pathian thu i awih tlat ang.
Gideona leh a sipaite ang khan engnge lo thleng dawn hre lawk hauh lo chunga ke i pen kha rinnain a ken tel a ni. Mahse Pathian chuan thil lo thleng tur a hmu lawk vek. Ti tura a tih che chu rinna nen i hlen thei ang.
Ngaihtuah zui atan.
Pathianin ti tura a tih che zingah engnge mak i tih ber? Engnge lo thleng?
Bible chuan mahni hriatnaah innghat suh a ti che . I nunkawng engah emaw Pathiana rinna nghat lova mahni ngaihdana rinna nghah a chakawm viau hun i tawng tawh em? Engvang nge?
I hriatthiam hauh loh thil zawm tura tih i nihin engnge i hlauhthawn ber?
[ Lettu: Mapuia Fanai ]
No comments:
Post a Comment