Monday, October 14, 2024

MALSAWMNA HMAIN FIAHNA A LO KAL HMASA ṬHIN

_Tihnghin Rualloh_

Rick Warren
14 Oct 2024
“Tangkaraw tihthianghlim angin anmahni ka tithianghlim ang a, Rangkachak fiaha a awm angin anmahni ka fiah ang. Ka hming an lam ang a, anmahni ka ngaithla ang.”
‭‭ZAKARIA‬ ‭13‬:‭9‬ ‭

Ṭawngṭaina ṭhenkhat chu chhan nghal mai a ni ṭhin a, ṭhenkhat erawh chuan chawlhkar, thla eng emawzat, kum hial pawh hun a la ṭhin a. I hriat hnu vek a ni ang! Mahse, thu lawmawm deuh a awm: Pathian chhanna i nghah lai khan, kawng danga i zir miah loh tur thil i zir chhuak ang.

Nghah a nih chhung pawh hian malsawmna a awm vek a. I duh engkim i hmuh hma khan nangmah kha i inzir nasa hle dawn a ni.

Ṭawngṭaina pawimawh ka tih ber ber pahnih chu, pakhat zawk chu Pathianin min chhan nan kum 13 a duh a, a dang leh chu kum 25 lai a duh a ni. Mahse min chhang tlat! Chutih lai chuan chung chu ka tana ṭawngṭaina pawimawh ber ber an ni. Engvangin nge hun a duh em em? Achhan chu, ka ṭawngṭai lai khan Pathianin keimahah hna a thawk reng a ni.

Meipui kaltlang ang maia nun i hman lai khan, engvanga chutiang kaltlang tur nge i nih i ngaihtuah ngai em? Fiahna leh tihthianghlimna hun a ni.

Thil eng emaw atan i ṭawngṭai i ṭawngṭai khan, fiahna i hmachhawnin i nihna kha a langchhuak tial tial a. Pathianin Zakaria 13:9 ah, "Tangkaraw tihthianghlim angin anmahni ka tithianghlim ang a, Rangkachak fiaha a awm angin anmahni ka fiah ang. Ka hming an lam ang a, anmahni ka ngaithla ang" a ti a.

Rangkachak hi a chhuannaah dahin bawlhhlawh awm zawng zawng a kan ral vek hma chuan mei sa takah an rawh ṭhin a. Engtin nge rangkachak leh silver hi a chhertuin a thinghlim tih a hriat? An thla an hmuh theih khawpa a awm khan a ni.

I nun ata bawlhhlawh paihfai a nih a nangmahah Pathianin a hmel a hmuh theih meuh chuan, meipui i paltlang meuh khan Pathian chuan tihthianghlimna a zo fel ta, "Ka hming an lam ang a, anmahni ka ngaithla ang". (Zakaria 13:9)

Ṭawngṭai chhana awmte hi fiahna hnua thleng an ni ṭhin. Malsawmna hmaah reng reng hian, fiahna a awm zel a. Hlawhtlinna pek tlaka a rin hma chein rilru hahna khawpin Pathianin a fiah ang che. Ṭawngṭai fan fanna hian kalphung a nei ve a ni.

Pathian chuan a fiah ngei ngei ang che mal a sawm hma che in. Chu fiahnaah chuan, nangmah i inzir ṭeuh ang. Ṭawngṭai i tawp dan chuan Isua ang tura i tana zirlai ṭangkai tak i hloh dawn a ni.

Nitinin ṭawngṭai fan fan ṭhin la. Fiahna tinrengah malsawmna a rawn thleng ang tih i hre reng dawn nia.

Ngaihtuah zui atan...

I ṭawngṭaia a chhan hmain Pathianin fiahna i kaltlang a phal hunlai kha ngaihtuah let la. Chumi hmang chuan engtin nge i ṭhan len han ngaihtuah teh le.

Isua i an telh telh kha engvangin nge a ṭul?

Engtin nge tunah hian Pathianun a fiah che? Ṭawngṭai fan fan turin engtin nge i tih ang?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...