Saturday, October 12, 2024

TAWRHNA HI THLARAU NUN PUITLINNA KALKAWNG A NI

_Tihnghin Rual Loh_

- Rick Warren 
- Oct 12, 2024

_"Rei lote in tawrh hnuin, khawngaihna Pathian, Kristaa a chatuan ropuina ṭawm ve tura kotu che chuan a venghim che anga, chakna, din ngheh theihna leh innghahna rinawm tak a pe ang che."_ (1 Petera 5:10, GNT)

Pathianin i nuna engkim mai, thil ṭha lote pawh thil ṭha lan chhuahtir nana hman a duh.

Harsatna kara nung che che chauh lova ṭhang lian zel tur chuan Pathianin harsatnate hnehnaa a chantir theih dan i hmuh a ngai a ni. Pathianin i nun tinghing ṭhin thilte tihnghin rual loha siam nan che a hman dan i hmuh a ngai a ni.

1 Petera 5:10-ah chuan heti hian kan hmu, _"Rei lote in tawrh hnuin, khawngaihna Pathian, Kristaa a chatuan ropuina ṭawm ve tura kotu che chuan a venghim che anga, chakna, din ngheh theihna leh innghahna rinawm tak a pe ang che."_ (GNT)

Hrehawmna hi ṭhan lenna man sang tak a ni. Pathian hriat kan duh, mahse puitlinna hi amaha lo awm ngawt a ni lo. Zan khat thil thua lo thleng thut a ni lo. Hun hlimawm lai chauha lo thleng a ni lo bawk. Tunlaiah chuan an siam lai hmu lovin thil an siam chhuah chauh kan duh, mahse thlarau lamah chuan hrehawm tuar lovin puitlinna a awm lo.

Mahse chanchin lawmawm tak erawh chu i nun tihnualtu che kha Pathianin i ṭhan lenna atana a hman an ni ṭhin. Hrehawmna hi a kalkawng a ni.

Hei hi i hriatthiam hunah chuan Danialan fiahna tam tak a paltlang hnua a neih ang sawi nghin rual loh nun nghet i nei ang.

Rom 5:3-5 ah chuan heti hian kan hmu, _"Tin, chuti chauh chu ni lovin, kan hrehawmnaah pawh lawmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a; tin, Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo va."_

Kan hun tawn khirh ber lai hian kan ṭhan hi a chakin a nghet ṭhin. Mi tam takin hahdam taka an awm lai aiin an awm hran lai, hna an neih loh lai, an dam loh lai, lungngaihnain a tlak buak laite a an ṭhan nasat zawk dan min hrilh fo.

Engvangin maw? A chhan chu he khawvela nun nuam taka siam hi Pathian tuizawng a ni lo. I nunchang ṭhan lenna hi a tuipui a ni, a chhan chu i nungchang chiah kha vanrama i chhawm tur anih vang a ni. Tunah khan sikulah i awm mek a ni a, Pathianin chatuan lawmman, nangmah nghaktu che a awm a ti a ni. A venghim dawn che a ni.

Chumi hma chu Pathianin nangmaha awm a, harsatnate hmachhawm thei tura chakna leh khawngaihna pek che a tiamah hian beiseina i nei thei ang.  I nuna thil ṭha lote pawh Pathianin thlitfim, kawhhmuh, tihdik leh venhim nan che a hmang thei a ni tih hriain "Beiseina thlawn ngai lo"-ah chuan rinna i nghat thei ang.

Ngaihtuah zui atan.

Chona i hmachhawnte en chung a, "He harsatna karah hian engtinnge ka ṭhan theih ang?" ti a i inzawh hian engtinnge i thil thlir dan a danglam?

Engtinnge beiseina hian tawrhna i thlir dan a nghawng?

Harsatna i tawh hunin engtinnge Pathianin a tibeidawng dawn lo che tih hriatna hian thil a tihdanglam?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...