_Ni 40 Chhung Ṭawngṭaina_
By Rick Warren
— Sept 20, 2024
“A nihna, mita hmuh theih loh, a chatuan thiltihtheihna leh a Pathianzia chu khawvêl siam tirh ata a thil siamahte chuan chiang taka hmuh theihin a lang a. Phatna tûr rêng an nei lo.” [Rom 1:20]
I ṭawngṭaina rah chhuah leh rah chhuah loh chu i ṭawngṭai tam lam aiin Pathian nihna i hriat danah chuan an innghat zawk. Pathian i hriatchian ang zelin, i ṭawngṭainate chuan rah an chhuah tam ang.
Ṭawngṭai dan kalhmang hrim hrim hriat ai chuan Pathian hriat chian chu a pawimawh zawk. Pathian chu engkima engkim a ni tih hriatna hmanga bul ṭan tur a ni. Chumi awmzia chu Pathian chu hun kal tawhah, tun hunah leh nakin hunah a awm. Khawvelah a awm a, thlarau khawvelah pawh a awm bawk.
Pathian chu engkima engkim a nihzia chu hetiang hian i hre thei ang.
A thilsiamahte i hmu thei.
Pathian khawvel hmai hrang hrang nei [multidimentional] siamtu chu nihna hrang hrang nei Siamtu a ni.
“A nihna, mita hmuh theih loh, a chatuan thiltihtheihna leh a Pathianzia chu khawvêl siam tirh ata a thil siamahte chuan chiang taka hmuh theihin a lang a. Phatna tûr rêng an nei lo.” [Rom 1:20]
Leilung mai thlir chuan Pathian nihna tam tak chu i zir thei ang. Entirnan, Pathian chuan thil hrang hrang a ngaina tih i hria a, a inrel fel a, thil thar a siamchhuak a, engkim titheitu a ni. Thilsiamte hi hriat harsa tak an ni, chuvangin Pathian chu ropui tak a ni tih i ring thiam thei ang.
Isua mihringa a lo channa [incarnation]-ah i hmu thei.
John 1:14 chuan, “Tin, thu chu tisaah a lo chang a, kan zîngah a lo awm ta a. A ropuizia kan hmu, Pa Fa mal neih chhun ropuina chu, khawngaih leh thutakin a khat.” tiin a sawi.
Pathian chuan fanghmir biak a duh chuan fanghmirah a chang ang a. Bawng chu a be duh a nih chuan bawngah a lo chang ang. Mahse Pathian chuan mihringte chu biak leh hmangaih a duh vangin keimahni angah a lo chang ta a ni.
Isua chu hmun leh hun chuan an thuhnuaiah an dah ve lo, a chhan chu nihna hrang hrang nei a nih vang a ni. “Mitthi zînga tho hmasa ber, leia lalte chunga hotu hnên aṭangin khawngaihna leh remna in hnênah awm rawh se.” [Thupuan 1: 4]
Thlarau Thianghlim chet vel danah chuan i hmu thei.
“Thli khawiah pawh a duh duhin a tleh ṭhîn, a ri i hria e; nimahsela, khawi aṭanga lo kal nge tih leh, khawiah nge a kal dâwn tih i hre si lo. Tu pawh Thlarauva piang chu chutiang chu an ni,” [Johana 3: 8]
Thlarau Thianghlim chu khuahkhirh theih a ni lo! I thunun thei lo vang. Thli ang mai a ni a. A lo kalna lam i hre thei lova, a kal zelna tur pawh i hre hek lo. Kan hawina lam lo lamah a che a ni.
Hei hi Pathian nihna hrang hrang nei chanchin i zir tawpna erawh ni suh se. Pathian hriat tih awmzia chu damchhung daih zir lai a ni- ni tin i nun tiduhawm zual deuh deuh thei tur chu a ni.
Ngaihtuah zui atan.
• Thilsiamte nihna i thlir changin anmahniah chuan Pathian nihna ang deuh engnge i hmuh ve thin?
• Pathian chuan nihna hrang hrang a nei tih i hriatna chuan amah hriat chian belh zel chakna i nei ve em? Eng vangin nge?
• Pathian chu engtin nge i hriat chian lehzual theih ang?
*Isua Krista chu i chhandamna atan i lo pawm ve tawh em?*
Bible chuan Pathian, a Fapa Isua Krista kal tlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duh zawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment