Saturday, September 21, 2024

PATHIAN HNENAH ENGPAWH I THLEN THEI

_Ni 40 Chhung Ṭawngṭaina_

- Rick Warren 
- Sept 21, 2024
_"Zing thla zârin, tuifinriat tawp daihah va awm ila; Chutah pawh chuan i kutin mi hruai ang a, I kut ding lamin mi chelh dawn si a."_ (Sam 139:9-10)

Englai mahin malin i awm ngai lo, a chhan chu Pathian hi englai pawhin khawi hmunah pawh a awm tlat a ni.

Pathian chu hun kal tawhah, awm mekah, leh hun lo la awm turah a awm tlat. Vanah leh leiah a awm a. Thlarau khawvelah a awm a, he khawvelah hian a awm bawk. Nangmahah a chêng a, i chungah, i velin a awm - a chhan chu khawiah pawh a awm tlat a ni.

Khawi hmun pawh tuam turin pathian chi hrang hrang an awm lo. Pathian pakhat, Pa leh Fapa leh Thlarau Thianghlim a awm. Kawng hrang hranga awm anih avangin malin i awm ngai lo.

_"I thlarau hnên ata hi khawiah nge ka kal ang? I hma ata hi khawiah nge ka tlan bo vang? Vanah han lawn ila, chutah chuan i awm si a: Seol-ah mutna siam ila, ngai teh, chutah chuan i awm bawk si a. Zing thla zârin, Tuifinriat tawp daihah va awm ila; Chutah pawh chuan i kutin mi hruai ang a, I kut ding lamin mi chelh dawn si a. 'Thimin min khuh bo tlat se, Ka vêl eng hi zan thim ni se' ti mah ila; Thim pawhin i lakah chuan engmah a hliah lo va, Zan hi chhun angin a eng zawk a ni: I tan chuan thim leh eng hi thuhmun reng a ni."_ (Sam 139:7-12)

Pathian lak ata bihruk tum suh. Khawiah pawh bihruk tum mahla chutah chuan a lo awm reng tawh ṭhin. Hei hi Pathian, khawi hmunah pawh awma a nihna chu a ni. A bul leh a tawp a ni a. Pathian a la awm ngai lohna, a awm mek lohna leh a awm ngai lohna tur hmunah i lo awm tawh ngai lova, i awm mek lova, i awm ngai hek lovang. Hei hian fuih che rawh se. Khawiah pawh kal la, i kiangah Pathian a kal ve zel ang a, chu hmunah chuan a lo hmuak zel ang che.

Mihringin kan hriatthiam phak rual loh khawi hmunah pawh Pathian a awm a, chuvang chuan i nunkawng engkim i hrilh thei. A lo hrethiam sa vek! A thuhnuaia awm lo i hun kal tawhah emaw, tun hunah emaw, hmalam hunah emaw a hnena thlen tur engmah a awm lo.

I ṭawngṭaina Pathianin a hriatthiam loh a awm lo. A hnenah engkim i thlen thei.

Ngaihtuah zui atan.

Pathian hmun tina a awm hian hlauhna min pe tih hi engnge a awmzia? Pathian hmun tina a awmna hian hlauhna a neihtir che chuan hahdam taka i awm theih nan Pathian hmuhah engnge dik taka i tihtur le?

Pathian hnenah i nunkawng engnge hrilh i inthlahrun?

Pathianin a hre tawh tih i hriat reng si kha engvangin nge a hnena thlen i duh loh?

*Vawiin hian Isua i zui dawn em?* 

Isua hnena inpe tura i inpeih chuan heti hian ṭawngṭai rawh le:
"Isu, nangmah ka rin phawt che chuan ka sualte ngaihdam a ni ang a, engtik niah emaw i hnena cheng turin min lo pawm ang tih min tiam chu ka ring e.

"I hmaah ka sual ka puang a, vawiin aṭang hian Isua hi min chhandamtuah ka pawm a che. Thil tih vang ni lovin rinna avanga khawngaihnaa chhandam kan ni tih hrilh avangin ka ring a che. Ka taksa zawng zawng i tan ka hlan e.

"Tiam chin awm lova min hmangaih avangin ka lawm a. Ka nun zawng mahni tan ni lovin i tana hman ka duh e. I hnenah ka inhlan a, i chhungkuaah min lo pawm ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...