_Ni 40 Chhung Ṭawngṭaina_
- Rick Warren
- Sept 22, 2024
_"I taksa, engkim - Pathian hnenah pe rawh- thihna ata nung leh niin Pathian tana hmanrua, a tana thil ṭha tihna tur atan i ni si."_ (Rom 6:13, TLB)
Pathian chu eng kawng zawng pawha che thei anih avangin i ṭawngṭaina pawh kawng khat chauhin kaltir suh. I ṭawngṭaina kha kawng hrang hrang chi ngain a hlan theih.
*I ṭawngṭaiin kraws lam enin hawi let rawh.*
Kraws en chunga ṭawngṭaina bul ṭan hian lawmna thinlung min neihtir ṭhin avangin a ṭha hle. Kraws lera i tana Isua thi i ngaihtuah let khan Pathianin eng ang chiahin nge a hmangaih che a, sual hi eng ang chiaha to nge a nih, tih leh eng anga thûka ngaihdam nge i nih tih a hriat chhuahtir ang che.
_"In thlahtute pek chhawn, in awm dan engkhaw ni lawilo lak ata chu, thil chhe thei, tangka leh rangkachaka tlan in ni lo va, beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a."_ (1 Pet. 1:18-19)
*I ṭawngṭaiin, nangmah hmangaihtu che, Pa, vana mi chu en ṭhin rawh*
Pathian i hmuh dan khan i nunkawng engkim, i ṭawngṭaina te chhanin a awm em tih thleng a nghawng ang. I ṭawngṭainaah thil pakhat chauh i thlak dawn chuan, Pathian chu "Ka Pa" tiin i koh dan thlak rawh. Eng anga nasain nge a hmangaih che tih leh eng ang takin nge i ṭhatna turin a thawh i hrethiam mai ang.
_*Thlarau ngei chuan keimahni thlarau nen Pathian fate kan ni tih min hriattir thin; tin, fate kan nih chuan roluahtute kan ni a."_ (Rom 8:16-17)
*I ṭawngṭaiin, nangmaha cheng Isua kha en rawh*
I nunah Isua a awm a, tiamkam nei lovin Pa Pathianin a pawm che. Hei hian i dik lohna te hmachhawn turin zalenna leh huaisenna a pe che a. Ṭha lam kawng i zawh hmain engnge ṭha lo tih i pawm a ngai.
_"Rinnaah chuan in awm emaw, nangmahni ngei inchhin thin ula; nangmahni ngei in fiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghal loh chuan."_ (2 Kor. 13:5)
*I ṭawngṭaiin Thlarau Thianghlimin a hman theih nan che dil rawh.*
Khawvel kalphung sawisel leh lo bûk lovin, "Thlarau Thianghlim, engnge dik lo tih min hrilh la, tidanglam thei turin min pui ang la. Min hmang rawh" tiin dil rawh. Pathian tana hman theiha i awm phawt chuan a hmang em em ang che.
Bible chuan heti hian a ti, _"I taksa, engkim - Pathian hnenah pe rawh- thihna ata nung leh niin Pathian tana hmanrua, a tana thil ṭha tihna tur atan i ni si."_ (Rom 6:13, TLB)
*I ṭawngṭaiin rinna nen i hmalam hun thlir rawh.*
Nu leh pate chuan an faten an hmalam huna a duhthusam an sawite hian ngaihnawm ti takin an thlir ṭhin- chutiang chiah chu Pathian pawh hi a ni! I ngaihtuahna, ruahmanna leh duhthusam te hrilh ṭhin rawh. Pa ṭha tak, a hnena i thlen hun lo nghak reng ṭhintu a ni.
_"He thil ṭha, nangmahnia tiṭantu Pathian hian Isua Krista ni-a tih zawh a nih thlengin a hruai ang che tih ka ring tlat a ni."_ (Philippi 1:6)
Ngaihtuah zui atan.
Engtinnge krawsa Isua hnathawh thlir chunga ṭawngṭaina hi lawmna thinlung a pek che?
I ṭawngṭaina kha fain amah hmangaihtu a Pa a bia ang hi a ni em? Engvangin?
Engtinnge harsatna chungchanga i ṭawngṭai dan i thlakna khan he khawvela i chet dan leh midangte rawng i bawlsak dan a tihdanglam?
*Ṭawngṭaina pawhimawh ber i hlan theih dan.*
Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)
Isua kaltlanga Pathian chhandamna dawng turin i inpeih em? Heti hian ṭawngṭai rawh le:
"Isu, ka sualna hian nang nena min ṭhen hrang reng hi ka duh tawh lo. Isua ka rin chuan ka thiltih sualte ngaidamin kan damchhan min kawhhmuh anga, i chhungkuaah min pawmin engtik niah emaw chatuana i hnena chêng turin vanramah min hruai ang tih ka ring tlat a ni.
"Isu, ka sualte i hmaah ka puang a, min Chhandamtu i ni tih ka ring e. Ka sualte ka puan a ka rin che chuan chhandam ka ni ang tiin min tiam a. Ka nunah lo lal turin ka sawm a che. Vawiin hian ka nun i tan ka hlan e.
"Min siam angin mahni duhzawng anga awm lovin ka nun zawnga i rawng bawl ka duh e. Ka nun i tan ka hlan a, min chhandam a i chhungkuaa min pawn turin ka ngen a che. Isua hmingin, Amen "
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]
No comments:
Post a Comment