_Ni 40 Chhung Ṭawngṭaina_
By Rick Warren
— Sept 19, 2024
“Ka rilru leh in rilru chu a inang lo,
Ka awm dân leh in awm dân pawh a inmil bawk hek lo,’
Lalpa thuchhuak chuan a ti.
Vân khi lei aia sâng a ni ang khian,
Ka awm dân hi in awm dân aia sâng a ni.
Ka rilru pawh in rilru aia thûk a ni.” [Isaia 55:8-9]
Vawi eng emawzat Pathian hnena i thil dil chu Pathianin i duh anga a chhan loh che emaw, i rin anga a chhan loh che a awm ngei ang, a chhan miah loh che pawh a awm hial thei.
Ṭawngṭaina chuan awmzia a nei lo tihna a ni em? Ni lo, vawi tam tak awmzia a nei tih i hre tawh ang. Pathian chu a ṭha lo tihna a ni mai em? Aih, Pathian chu a ṭha, na i neih pawhin neih loh pawhin. Ṭawngṭaina chu i tlawmsan mai dawn tihna a ni thei em? Aih! Pathian chu kan duh duh kan herhchhuahna theihna khawl [vending machine] a ni lo, ṭawngṭaina pawh na chhawkna [painkiller] a ni hek lo. Natna awm lo nun min tiam ngai lo hrim hrim zawk a ni.
Natna i neih chang leh i ṭawngṭai changa chhanna i hmuh loh chuan tawpsan mai suh. I tih tur chu ṭawngṭai zel a, amah rin zel chu a ni, a chhan chu i nuna thleng tura a phal apiangte chu a ṭha zawngin a her chhuahtir zel ang. Pathian chu a ṭha a, Pa ṭha tak a ni, na i neih lai pawhin.
Doctor-in i taksa a zai hawn chuan eng emaw na chu a awm ngei ang. Mahse chu inzaina [surgery] chuan i nun a chhan a nih chuan doctor chu a ṭha lo tih i sawi tawh lovang; chu natnain a ken tel inzaina chuan i nun a chhan a ni tiin i sawi tawh zawk ang.
Pathianin i natna te chu a laksak mai lo che a nih chuan “I natna chu a na hle a ni mai thei. Mahse ka khawngaihna i tan a tawk e,” a tihna a ni.
Ka nunah hian na tam tak ka lo paltlang ve ta. Mahse hringnuna ka thil zir chhuah pawimawh ber berte chu natna aṭanga ka zir chhuah an ni. A chhan chu Pathian chuan nuam taka min awmtir ai chuan mi puitling min nihtir chu a ngai pawimawh daih zawk. Pathian chuan mi puitling tak nihtir che chu nuam taka dah che ai chuan a ngai pawimawh zawk daih. I nunah khan natna emaw harsatna emaw i tawk ngai lo a nih chuan i ṭhang puitling thei ngai lovang.
“Ka rilru leh in rilru chu a inang lo,
Ka awm dân leh in awm dân pawh a inmil bawk hek lo,’
Lalpa thuchhuak chuan a ti.
Vân khi lei aia sâng a ni ang khian,
Ka awm dân hi in awm dân aia sâng a ni.
Ka rilru pawh in rilru aia thûk a ni.” [Isaia 55:8-9]
Pathian chuan i nunah chuan thilṭha a duh a, nangmahin i duh ai pawhin. Amah chu i ring thei dawn em?
Ngaihtuah zui atan.
Engtik laiin nge natna i tuar chuan a ṭhan puitlintir che?
Eng vangin nge a chang chuan nawmsakna aiin natna chuan nangmah leh Pathian inkar thuah chuan thil a zirtir tam zawk che nia i hriat?
I dilna eng ber nge Pathian chuan a la chhang lo nia i hriat? Taksa chhandamna piah lamah chuan, i thil tawn aṭang chuan taksa tuarna bakah eng nge zir chhuak tura a duh che ni ang?
Vawiin hian Isua chu i zui dawn em?
Isua hnenah i nun chu i lo la hlan lo a nih chuan he ṭawngṭaina hmang hian bul ṭan ang che:
“Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min
Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]
No comments:
Post a Comment