_Nun Hunbi Hrang Hranga Ṭhan Dan_
- Rick Warren
- Sept 8, 2024
_"Felna avanga tihduhdah tuar hnute chu an eng a thawl e; van ram an ta a ni si a. 'Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang.'"_ (Matthai 5:10-11)
Isua i hmangaih avang leh mi dangte'n an hmangaih ve si loh avanga turna/ tawt up upna i tawh hunin heng thil pathumte hi hriat reng i duh ṭhin ang:
*Dodalna hian Isua a antir zawk thei tlat che:*
Isua chuan Johana 15:18-19-ah, _“Khawvêlin a huat che u chuan, a huat hmâ che u pawhin Kei chu min lo haw tawh tih in hria e. Khawvêl mi ni ula, khawvêl chuan ama mi chu a hmangaih ang chu. Khawvêl mi in ni si lo va, khawvêl ata ka thlan chhuah in nih tâk avâng hian khawvêlin a hua che u a ni zâwk e."_ a ti a.
I lo ṭhanlen a Isua i an theih nan chuan heng a paltlang angte hi i paltlang ve phawt a ngai, khawharna te, hnualna te, lungngaihna te leh thlemna te. Pathian,a Fapa pawh zuah lotu chuan engtin nge nang tehlul zuah bik tur che a i ngaih theih?
*Dodalna chuan rinna thuk zawk a siam ang che:*
I rinna kha tihrawl ang a ni. Tihrawl chu ṭhut mai maiin emaw puakzo ei avangin emaw a lian thei lo. Tihrawl chu tihmar te, san mar te leh fiahna te hmangin a lian ṭhin. Lehlam a pawttu rit a awm loh chuan tihrawl a lian thei lo.
I nunah eptu i neih loh chuan i rinna a ṭhang thei lovang. Khawvela rinna nghet ber ber neitute chu rinna fiah a awm tam ber te hi an ni. I Petera 1:7-ah chuan, _"In rinna dikzia, meia fiah tawh chu, rangkachak boral leh mai theite aiin a hlu zâwk si a; chuvângin Isua Krista inlâr hunah chuan fakna leh châwimâwina leh ropuina chu in la hlawh ngei ang."_ tih kan hmu.
*Dodalna chuan chatuan lawmman a pe ang che:*
Matthaia 5:10-11-ah chuan hei hi kan hmu, _"Felna avanga tihduhdah tuar hnute chu an eng a thawl e; van ram an ta a ni si a. 'Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang.'"_
Pathian chuan amah avanga an damlaia tihduhdahna tuartute chu mal a sawm dawn. Nunrawn leh ngeiawm avangin tumahin lawmman an dawng ngai lo. Tihduhdah i tuar lai a mahni thiam i inchantir tlat chuan martar i ni lo, mi bengtla lo tak i ni ngei ang.
Isuan i anna avangin lawmman pek i ni dawn. I thil rin te i puanchhuah chuan zaidam tak leh mi zahna nen ti ang che Isua ang chiah khan; tichuan, engtikah emaw vanramah lawmman pek i ni ngei ang.
Ngaihtuah zui atan
I rinna fiaha a awm laiin engtin nge i lo dawn sawn ṭhin? I dawn sawn dan kha Pathianin eng angin nge a ngaih i rin?
Tihduhdahna hi eng angin nge i hnam ziaah a lan?
Eng vangin nge tihduhdah tuartute ṭawngṭaipui a pawimawh?
Isua chungchangah eng nge i duhthlanna ni le?
Fapa Isua Krista kaltlangin Pathianin a hmangaihna che a rawn finfiah a. Bible chuan, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ (Johana 3:16)
Chatuan nunna min tiam a tihhlawhtlin theih nan Pathian a rinna nghah i inpeih tawh em? I inpeih chuan hetiang hian han ṭawngṭai ta che:
"Lalpa duhtak, ka sualnate hi i lak aṭanga min ṭhen hrangtu ni turin ka duh tawh lova. Isua ka rin chuan ka thil tihsual zawng zawng ngaihdam leh ka nun chhan min kawhhmuh a vanramah i chhungte ni a chatuana awm turin min tiam a.
Isu, ka sual te ka puang a min chhandamtu i ni tih ka ring ta a. Chhandamna chu thil tih vang ni lovin khawmgaihna leh rinna avang a lo awm a ni i tih kha ka pawm a. Ka nunah hian Lal angin lo cheng la ka duh a. Vawiin hian i kutah ka nunna ka dah a. Min siam chhan ang taka nun a ka nun lo la awm tur zawng zawng hi i rawngbawlnan hman ka duh a mi. Isua hmingin ka dil e. Amen"
Lettu: Mapuia Fanai
No comments:
Post a Comment