Saturday, September 7, 2024

BUAINA CHING FEL TURIN I HAWI LAM THLAK RAWH

_Nun Hunbi Hrang Hranga Ṭhan Dan_

- Rick Warren 
- September 07, 2024
_"Mahni ta ta mai en lovin, mi dang ta pawh en ṭheuh zawk rawh u. He rilru, Krista Isua pawha awm bawk kha, nangmahniah awm rawh se."_ (Philippi 2:4-5)

Midang nena in buaina ching fel tur chuan i harsatna tak i hrilh hmasak a ngai ṭhin a. Chumi hnuah an natna leh ngaihdan i ngaihthlaksak a ṭul ve leh bawk.


Ngaihdan inan loh avanga inhnial niah kan inngai a. Mahse kan rilru sukthlekah zawk a ni kan inhnial ni. Buaina a awm reng rengin tu emaw rilru tihnatin a awm ṭhin. Ṭhenkhatin tham lo taka an khum niin an inhria a. Ṭhenkhatin ngaihthah niin an inngai bawk. Kan duh dan inan lohna kha buaina thlentu a ni lo. Chumi phena kan rilru puthmang zawk chu buaina thlentu zawk chu a ni.

Rilru hliama awmten midang rilru an hliam ṭhin. Mi, a rilru a nat poh leh midangte chungah an in leih baw nasa ṭhin. Rilru na lo chuan midang an hliam ngai lo. Hmangaihnaa khat mi chuan midang chungah hmangaihna an lantir a. Remnaa khat mi chuan midangte chungah remna thinlung an pu ṭhin. Mahse chhungrila hliam tuarte chuan midangte pawh an hliam fo ṭhin. An natna midangte chungah an leih baw ṭhin.

Mahni thil zawrh lai hralh thei mi tak nih i duh chuan i thil zawrhah bul ṭan suh. Zirtirtu emaw pastor emaw ṭha tak nih i duh chuan - midangte nen inlaichinna ṭha tak neih i duh chuan - midangte mamawhzawng, natna leh tuizawng thilah te bul i ṭan a ngai.

Philippi 2:4-5 ah chuan heti hian ka hmu, _"Mahni ta ta mai en lovin, mi dang ta pawh en ṭheuh zawk rawh u. He rilru, Krista Isua pawha awm bawk kha, nangmahniah awm rawh se."_ 

Midang nen buaina in neihin an dinhmun ngaihthlaksak lovin i ṭanhmun kha a dik a ni tih hmuhtir tumin i bei ṭang ṭangin ṭhin em? An thu ngaithla miah lova mahni dikna sawi i tum ngar ngar anih chuan in inkar a khi zau telh telh tihna a  ni ang.

I thil thlir dan i thlak a ngai, i mamawh chauh i thlirna dah ṭhaa midangte mamawh i thlir a ngai. Buaina chin felna hi thil awm dan kan thlir dan kan thlak danglamnaah a inṭan. Philippi 2:4-a "en" tih thumal hi Greek ṭawng _scopos_ tih aṭanga lak a ni. Hemi thumal aṭang hian en hnaihna/ en lenna hmanrua te (microscope leh telescope) hi an hming vuah a ni.

_Scopos_ tih awmzia chu ngun taka en tihna a ni. I rilru puthmang kha Isua Krista ang a ni tur a ni. I natna ni lova mi natna i en, i ngaihtuah hmasak khan Isua i lo ang nasa leh zual dawn tihna a ni.

Heti hian upa te chuan an lo sawi ṭhin: "Hriatthiam nih i inbeisei hma khan hriatthiam tum hmasa ṭhin rawh." I mamawh en hmasa lova midangte mamawh i en hmasak khan lainatna leh khawngaihnaah i ṭhang lian ang a, thil awm dan i hrethiam leh zual ang. Tichuan i buaina ching fel turin hmalam i pan thei ang.

Ngaihtuah zui atan.

Midangte kan ngaihsak hmasak theih nan engtinnge Isuan entawn tur min hnutchhiah?

Engtinnge midangte mamawh i ngaihsak a ni tih i lantir ang?

Buaina chinfel kawnga midangte i ngaihthlak a i ngaihsak hmasak theih nan engtinnge i inbuatsaih ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...