Thursday, September 5, 2024

THLEMNA HNEH THEIH DAN KAWNG HNIH

_Hunbi Hrang Hranga Than Dan_

By Rick Warren
— September 05, 2024
“Chhandamna chu lukhumah hmang ula; Thlarau khandaih, Pathian thu chu pai rawh u.” [Ephesi 6:17]

Thlemna lakah chiang taka hnehna i chang duh a nih chuan Pathianin a Thua thlemna hnehna thu a sawi chu nangma tan hauh tlat ang che. Mi zawng zawngten I Korinth 10: 13 thu “Fiahna in tawh ṭhin hi mi tawh bâk a awm chuang lo. Pathian chu a rinawm a, in tawrh theih aia nasa fiahna in chungah a thlentîr lo vang, in do zawh theih nân fiahna lo thlen rualin pumpelhna kawng a siamsak zâwk ang che u” tih thu hi an vawnin vawng ngei ila a ṭangkai hle ang. 

Mi tam tak chuan, “Ka inchingfel thei ngang lo a ni” tiin min lo hrilh fo tawh ṭhin. “Hneh theih a ni lo a ni. Tlawm mai loh chu tih dan a awm ngang lo a ni” te pawh an lo ti tawh bawk. Chutianga i sawi a nih chuan Pathian chu dawt sawi hmangah i chhuah der tihna a ni. Thlemna hrang hrangah chuan a chhuahna a siam zel a ni tih a sawi tlat. A harsatin a khirhkhan mai thei. A nuam lo viau thei bawk. Mahse a chhuahna kawng erawh a awm zel ang. Pathian chuan a awmtir ngei a ni! Chu chu a thutiam chu a ni. 

A thutiam chu i pawm dawn em? 

Setana chuan i rilru lak pen tumin a bei ngar ngar a. Pathianin ngaihdan thar min pek chu pawlna thar a ni. Setanan ngaihdan min pek erawh chu thlemna a ni thung. Nitin eng ngaihdan zawkah chuan nge i awm dawn tih chhut mawlh mawlh ang che.  

I rilruah chuan thlemna chu thutaka i thlak zel chuan hnehna i chang ang, chu thutak chu Bible-ah a awm a ni. 

Bible chuan sual chu do ngei turin min duh a. Chu chu engtin nge i tih ang? Thlemna atana lo inbuatsaihin. Ephesi 6: 17 chuan hetiang hian a sawi, “Chhandamna chu lukhumah hmang ula; Thlarau khandaih, Pathian thu chu pai rawh u,” tiin. 

Thlemna hmachhawn thei tur chuan thil pahnih i tih a ngai ang - 

Chhandamna chu a rahbi hmasa ber a ni: “Chhandamna lukhum chu khum ang che.” Lukhum chuan eng nge a thawh? I lu leh i thinlung chu a veng a, chu chu indona hmun chu a ni. Sual hnena “aih” i tih hma chuan Isua Krista hmaah chuan “Aw” tih i zir hmasak a ngai ang. A thiltihtheihna chu chhandamna hmangin i chang a ni. 

A rahbi pahnihna chu Pathian Thu ngunhnam hman chu a ni. Pathian Thutak chu thlemna dona a ni. In chaw eina dawhkanah chuan i Bible chu i dah mai thei a, mahse i kawl mai lo a nih chuan thlemna a hnai a, engtin nge i tih ang? Bible-a thutak awm chu i ngaihtuahnaa i seng luh a ngai a ni. 

Hnial rual lovin, thlemna hneh theih dan kawng pawimawh ber chu Bible chang vawn a ni. Bible thu vawn i nei lo a nih chuan, indona hmanrua i nei miah lo tihna a ni! Setana a lo kal hun chuan, engtin nge i lo do tak ang? I ngaihdan kha a hlau lem lo, mahse thutak erawh a hlau hle thung. Pathian ngunhman chu Pathian thutak a ni, mahse chiang taka i vawn zet loh chuan hmanruaah a hman tlak loh thung. 

Ngaihtuah zui atan. 

Tun karah hian Pathian thu vawng turin engtin nge hun i hman ang? 

Pathian thu i vawn mek lai chuan tuin nge pui ang che? Chutiang mi an lo awm ve chu eng vangin nge a ṭangkai?

Chhandamna rahbi hmasa ber chu i lo rap ve tawh em? 

Bible chuan hetiang hian a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...