Sunday, August 4, 2024

PATHIANIN A HRIA A, A NGAIHSAK CHE

_Min Tidanglam Ta_

- Rick Warren 
- August 04, 2024
_"Pain a fate a khawngaih ang hian, LALPA chuan mah ṭihtute chu a khawngaih ṭhin."_ (Sam 103:13)

Pathian chu mi nghaisak a, hmangaih leh khawngaih thei tak Pa a ni. I hriatthiam phak aia nasain a hmangaih che. I man thiam phak bakin a hmangaih che! Pathian chu hmangaihna a ni a, a hmangaih ni turin a siam che a. A thiltih apiangah a hmangaihna che a tilang a. Pathian chu a mite ngaihsak ṭhin Pa a ni.

Bible chuan Sam 103:13 ah chuan, _"Pain a fate a lainat ṭhîn ang hian, LALPA chuan amah ṭihtute chu a lainat ṭhîn"_ a ti. Pathianin i nunkawng engkimah lainatna nen a ngaihsak che, a awmzia chu a ngaihtuah che tihna a ni. 

Marka bung 4-ah chuan, ni khat chu zirtirte sangha man tur a an chhuah laiin, Isua chu a chauh avangin lawng kil khatah chuan a lo muhil a. Tichuan thlipui a lo tleh a, mahse zirtirte kha a tibuai tur a ni hauh lo. Sangha man a eizawng an ni a, vawi tam tak thlipui an lo tuar tawh a an ngai neih tawh. Mahse, hei zet chu thlipui na tak a ni ngei tur a ni, an hlau tlat. An mangang em em a, Isua an kai thova, zawhna pawimawh em em an zawt ta a: "Zirtirtu, kan boral hi pawi i ti lo vem ni?" tiin.

He zawhna ang hi englai pawhin kawng hrang hrangin Pathian hnenah kan zawt reng ṭhin:

"Lalpa, doctor report hi i hmu em? Min ngaihsak lo em ni?"

"Kan nupa inkar hnawtzia hi i hmu em? Min ngaihsak lo em ni?"

"Kan sum neih tlem zia leh kan inenkawlna senso tam si zia hi i hmu em? Min ngaihsak lo em ni?"

"Ka faten sikula an beih nasat zia hi i hmu em? Min ngaihsak lo em ni?"

"Hlauhnain min chelh tlat avangin ka kiansan thei lo a ni tih i hria a. Min ngaihsak lo em ni?

A chhanna chu, aw, Pathianin min ngaihsak tih hi a   ni. A nihna takah chuan i ngaihsak aia nasa khan a ngaihsak che. Nangin ṭanpuitu tur che i hriat aia nasa daihin a hria a. A hria a, a ngaihsak che.

_"Anin a ngaihsak ṭhin che u avangin in manganna zawng zawng ama chungah nghat vek rawh u."_ (1 Petera 5:7)

Vana in Pain eng anga nasain nge a ngaihsaka a enkawl che u tih in hriat chuan i hmangaih let lo thei lo ang. Pathian hi hla riau a i hriat tlat chuan a fate ngaihsak ṭhintu Pa a ni tih i hriat loh vang a ni ang. 

Pathian i hriat chian chauhin a hmangaihna che thûkzia i hrethiam chauh ang. Vawiin hian amah nen hun hmang rawh- vawiin mai ni lo, nitinin. Amah i hriat chian zawh poh leh a ngaihsak che tih i hrechiang ang.

Ngaihtuah zui atan.

Tunah khan Pathianin a ngaihsak che tih ringhlel tur khawpin engnge i paltlang mek le?

Engtinnge Bible-in Pathian hmangaihna hrechiang leh zual tura min puih le? Eng Bible changah te nge Pathianin min ngaihsak a ni tih min tiamna te kan hmuh?

I manganna zawng zawng Pathian chungah ngah tih hi engnge a awmzia?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...